Alejandro Arribas, en rolda de prensa en Abegondo, manifestou que o obxectivo do equipo este mércores 20 de setembro ante o Alavés (21:00 horas, Gol) é "gañar. Coma se gañamos 5-4. Quero gañar e sumar 3 puntos. Daquela ninguén se acorda se che meteron máis ou menos. Só te acordas dos puntos que tes no teu marcador, que é o máis importante".
Asegura que o cadro "cando pasan 4 xornadas e o equipo non conseguiu a vitoria obviamente non está do todo ben. O equipo segue a súa dinámica boa. A xente traballa ben, está centrada no traballo. Todo o mundo está disposto a facelo ben cando lle toque. Ese é o camiño. Seguir traballando, tentar mellorar e corrixir aspectos dos partidos anteriores. Aos poucos lograr ese equilibrio".
Advirte que non lle importa o cambio de adestrador no Alavés: "Só penso en gañar e sumar os 3 puntos. Dáme igual quen sexa o adestrador. O adestrador non xoga, xogan só os xogadores. Tennos que dar igual quen estea enfronte".
Arribas pide tranquilidade: "Nerviosos estaremos cando a cousa se complique realmente e queden poucos partidos para o final de temporada. Isto acaba de empezar. Non sempre empeza como acaba e acaba como empeza. Paciencia, tranquilidade. O equipo está a traballar, tentando mellorar cada día. A ver se o mércores podemos sumar os tres puntos".
Do rival, o Alavés, subliña o central deportivista que "do seu once titular o ano pasado perderon 6 ou 7 xogadores titulares como Kiko Femenía, Theo, Llorente, Camarasa, Deyverson... Perderon unha chea de xogadores importantes para eles. Veu moita xente nova e ten que adaptarse. Ten bo equipo, non lle está saíndo as cousas. Pero nós tamén temos bo equipo, tampouco nos están saíndo as cousas. Temos que centrarnos en nós".
