Augusto César Lendoiro: Un dos retos máis importantes do Club
As reaccións ao sorteo da primeira fase de UEFA Champions League non se fixeron esperar. Así, Augusto César Lendoiro, presidente do Deportivo, manifestou que Bayern, Deportivo, Milán e Lens integran "o grupo ao que seguro ninguén quere ir".
Para Lendoiro "estamos ante un dos retos máis importantes da historia moderna do Club" e engadiu "pero cabe destacar que neste grupo o Deportivo ten tantas posibilidades como o que máis, como xa demostrou noutras ocasións". O feito de que o Deportivo comece a súa andaina o día 18 en Munich "supón visitar un dos templos do fútbol que nos quedaban por visitar" dixo o mandatario branquiazul e afirmou "seguro que os xogadores estarán moi motivados e máis concentrados ao ver o grupo que nos tocou".
Ademais o presidente fixo un chamamento á afección "oxalá estes rivais na liga de Campións animen aos afeccionados a facerse socios, temos que apoiar ao equipo, chegar aos 30.000. Ademais, é o club onde é máis barato abonarse, é o único que baixou co Euro e hai que destacar que os socios poderán ver a Milán, Bayern e Lens a uns prezos moi reducidos".