O Deportivo completou esta mañá unha nova sesión de adestramento en Abegondo, coa mente xa posta na visita do Betis ao Estadio ABANCA-RIAZOR, deste luns 12 de febreiro (21:00 horas, Gol), en partido da 23ª xornada de LaLiga Santander.
A mañá arrincou na sala de vídeo. Nada máis acabar, e após uns estiramentos no vestiario, o equipo saltou ao céspede do campo 2 para un traballo de posicionamento e outro de posesión.
A continuación, os futbolistas traballaron por liñas nos campos 2 e 3. Un partido táctico, un ensaio de posicionamento defensivo e unhas finalizacións para os dianteiros puxeron o punto e final a dúas horas de adestramento sobre o céspede.
Mañá domingo, o cadro está citado ás 17:00 horas en Abegondo. Nada máis concluír, Clarence Seedorf dará a lista de convocados, que se concentrarán ás 21:00 horas no Hotel Meliá María Pita á espera do encontro ante o Betis.
