As familias de Arsenio Iglesias, José Luis Vara e Virgilio Rincón, xunto a decenas de doantes históricos de pezas crave da historia do Club, protagonizaron unha visita moi especial ao recentemente inaugurado Dépor Museo & Tour. Foi un reencontro coa esencia mesma do deportivismo.
Moito máis que un percorrido por vitrinas e recordos, a xornada converteuse nun encontro cargado de emoción, memoria e gratitude. Nas tres salas, impregnadas de historia branquiazul, respirábase un ambiente distinto. Cada fotografía, cada camiseta e cada trofeo parecía falarlle directamente a quen forman parte do legado vivo do Dépor.
A presenza destas familias, estreitamente ligadas a capítulos decisivos da nosa traxectoria e grazas aos cales hoxe é posible que exista o Dépor Museo & Tour, outorgou ao momento un simbolismo profundo. Non se trataba dunha visita ao uso, senón dun acto de respecto e recoñecemento a quen axudaron a construír tantas páxinas memorables do club.
As súas miradas, detidas ante imaxes e obxectos que marcaron épocas, reflectían orgullo, emoción e unha nostalxia serena. Foi un instante de conexión auténtica entre xeracións.
Especialmente significativo resultou o agradecemento aos doantes, por exemplo, o fotógrafo Pedro Puig, o ex capitán do Súper Dépor José Ramón ou a ex xogadora do Karbo Deportivo Inma Castañón. Grazas á súa xenerosidade e a de decenas de deportivistas, pezas que durante anos formaron parte de recordos íntimos hoxe forman parte do patrimonio colectivo do deportivismo. Cada obxecto cedido como unhas botas desgastadas, un documento conservado con mimo ou unha reliquia gardada durante décadas é un xesto de compromiso coa historia e co futuro.
A xornada deixou unha mensaxe clara: o museo non é só un espazo expositivo. É un punto de encontro onde pasado e presente danse a man. Porque o verdadeiro patrimonio do Dépor non se mide unicamente en títulos, senón nas persoas que protexeron a súa memoria e souberon transmitila con orgullo xeración após xeración.
Todos os deportivistas que queiran contribuír co Dépor Museo & Tour e desexen ceder algún obxecto, deben dirixirse ao correo museo@rcdeportivo.es.