-Foto: Amancio e Luis Suárez, nun partido de veteranos do Dépor contra un combinado Real Madrid-Atleti en Riazor en 1976-
Amancio Amaro Varela (A Coruña, 16 de outubro de 1939) faleceu hoxe en Madrid aos 83 anos. Amancio foi un dos futbolistas españois máis importantes da súa época e dos xogadores nados na Coruña e exfutbolistas do Deportivo cun maior recoñecemento nacional e internacional.
Criado no Victoria CF, incorporouse ao RC Deportivo na temporada 58-59 en Segunda División, categoría na que xogou as catro temporadas como branquiazul, logrando o ascenso ao final da súa última campaña en Riazor, con 25 goles en 26 partidos, alcanzando o pichichi da categoría.
Os seus números neses anos, 69 goles en 108 partidos coas Nosas Cores, permitíronlle asinar polo Real Madrid, co que disputaría 14 temporadas até a súa retirada na campaña 75-76. Entre medias, 471 partidos, 155 goles, 9 ligas, 3 Copas, 1 Copa de Europa de Clubs (a sexta do Real Madrid con gol seu na final), o Balón de Bronce e 1 Copa de Europa de seleccións, a primeira de España, con quen anotou 11 goles nos 42 partidos disputados.
O RC Deportivo quere trasladar á familia Amaro, a todos os seus amigos, excompañeiros, deportivistas e persoas da Coruña que compartiron a súa vida con el, as súas máis sinceras e cariñosas condolencias. DEP.
