Fernando Vázquez tomou os mandos do primeiro cadro branquiazul esta mañá en Abegondo. Fíxoo con expectación mediática e acirrado por unha trintena de afeccionados que se achegaron á Cidade Deportiva, algún até con pancarta de benvida: "Loitamos por ti e aquí estás!!! Querémoste Fernando".
Acompañado polo preparador físico Manuel Pombo, o técnico deportivista reuniuse cos futbolistas no vestiario por espazo de case 40 minutos, e dirixiu a continuación a súa primeira sesión no campo 2.
Após un quecemento, os xogadores, hoxe cos fabrilistas Boian e Mujaid, realizaron rondos, un exercicio de finalizacións e, por grupos, progresións e unha serie de partidos en espazo reducido.
Adestráronse á marxe do grupo Gaku, David Simón e Borja Valle, este a consecuencia dunha contusión nasal que sufriu onte.
Mañá martes, 31 de decembro, o Dépor despedirá 2019 cun adestramento ás 11:00 horas en Abegondo. Antes, ás 9:30, o cadro reunirase para almorzar nas instalacións habilitadas para tal fin.
