Irene Ferreras comentou esta mañá en rolda de prensa que "por sorte cunha vitoria puidémonos colocar outra vez en posto de ascenso directo. É importante agora manter esa calma porque isto é moi positivo a nivel anímico, pero doutra banda lévache a sacar a calculadora, a botar contas, mesmo a adiantar resultados que aínda non se deron".
Desvela que lle pediu ás súas xogadoras "que fagan un esforzo moi grande por non mirar máis aló deste domingo", ás 12:00 en Abegondo ante o Real Oviedo (Youtube RC Deportivo), porque "cando xa che queda pouco tempo é moi fácil botar a vista ao que tes a curto prazo pero agora o máis importante é facer ese gran esforzo para estar presentes no que toca".
Non cre que as súas xogadoras "se vaian a desconcentrar. Neste momento da temporada as futbolistas saben da importancia que ten cada partido e cada punto que nos xogamos" pero advirte que "no fútbol sempre está a posibilidade de que o resultado non che dea a razón e cando ti creas unha idea na túa cabeza e logo esa idea cambia, a nivel mental pódeche desestabilizar un pouquiño. Por iso quero e tentamos no día a día que esteamos presentes no agora, no adestramento de agora, no de mañá, no partido do domingo e máis aló diso non pensar".
A adestradora branquiazul deu por finalizada en Albacete a mala xeira do Deportivo ABANCA aínda que apunta que "a nivel emocional, o equipo xa viña de estar facendo bos partidos, facendo bos momentos de partidos mesmo".
Cre que a vitoria da pasada fin de semana ante o CD Alba Fundación, "á parte dos 3 puntos, ten tamén un significado anímico importante pola maneira na que foi", ao remontar un 2-0 en contra.
Indica que "ás veces levas 3 puntos e ás veces cando o partido se pon tan en contra levas moito máis, que é ver como competiu o equipo e como se repuxo ante unha situación tan complicada. Ás veces o fútbol ten estas cousas. Viñamos da semana anterior, onde contra o Granada CF quedamos ás portas de facer esa remontada. E, casualidades da vida, vesche 7 días despois no mesmo contexto, coa mesma situación no descanso, que é 2-1 perdendo, e a partir de aí o equipo creu, fixo as cousas que tiña que facer, tivemos paciencia, deu unha mostra de madurez moi importante e iso pois nos reforzou moitísimo de cara ao que vén".
Irene Ferreras subliña que o partido en Albacete "máis aló do resultado supón experimentar a grandeza que ten este equipo e que aínda temos moitas cousas que facer positivas para terminar ben a competición".
Do Real Oviedo destaca que "é moi perigoso porque se xoga moitísimo e non pode fallar. Nós temos que mirar o noso, tentar facer un partido moi serio, controlar moi ben as súas transicións, o seu xogo directo. É un equipo que coa chegada de Joseba Aguirre cambiou moitísimo o seu estilo. Agora tenta chegar moito máis rápido, chega por fóra, centra, exponse menos; e nós ese tipo de partidos xa o habemos vivenciado. Maduramos moito á hora de xestionar ese tipo de situacións e temos que tentar estar precisas no noso xogo e moi alerta para tentar reducir as probabilidades que o rival che faga dano".
Despois de que Deportivo ABANCA e Real Oviedo disputáronse durante varias temporadas a praza de playoff de ascenso a Primeira División, "nós miramos polo noso ben e non desexándolle mal a ninguén. Dáche pena que un equipo como o Oviedo estea nunha situación difícil pero a liga é moi competida, as cousas son moi complicadas".
