Kuki Zalazar foi presentado esta mañá como novo xogador do Dépor para esta temporada en curso e a próxima.
Acompañado por Eduardo Blanco, Conselleiro do Club que representou ao Presidente Antonio Couceiro, fóra da cidade estes días, o novo dianteiro deportivista pousou en primeiro lugar para os medios gráficos no campo principal coa camiseta Galicia Azul.
A continuación, ante os medios de comunicación, mostrouse en primeiro lugar "moi contento de estar aquí, moi ilusionado".
Zalazar ve "un equipo moi bo, con moi bos xogadores"; e queda do pasado sábado con "o ambiente de ABANCA-RIAZOR con #ANOSAFORZA. Foi unha pasada. En Segunda non hai estadios como este, coa afección que ten este equipo. Hai un equipo moi moi bo e que vai facer grandes cousas".
Afirma que ao longo da súa carreira, "sempre xoguei de dianteiro, de 9. Logo co paso dos anos fóronme pondo de 10 e o ano pasado na SD Ponferradina de banda. Eu nunca fora banda pero son posicións que un aprende, que son boas para o teu futuro, poder xogar en varias posicións para así darlle alternativas ao míster. Pero as posicións que máis me atopo son de 9 ou de 10".
Explica que este verán "cando me chamou o Dépor non o dubidei. Eu quería saír da SD Ponferradina. Tiña dous anos máis de contrato. É verdade que está en Segunda, estaba a contar con poucos minutos, pero polo menos estaba a entrar; pero eu o que quería era sentirme importante, xogar e cando temos un equipo como o Dépor é moi difícil dicirlle que non. É un histórico que ten o Club e a afección de Primeira e é moi difícil dicirlle que non. Estou moi ilusionado de estar aquí", insiste.
Desvela que a temporada pasada xa se tentou a súa chegada ao Deportivo "e ao final fun á Ponfe e este ano desde o principio. Eu quería ver se podía gañarme un posto alí, quería ser importante. Como che dixen, o Dépor é o Dépor".
É consciente que ten "moita" competencia no ataque. Así cre por exemplo que Quiles e Mario Soriano son "dous moi bos xogadores e eu veño porllo difícil ao míster, a achegar o meu grao de area e a ver que pasa".
Asegura estar "preparado" xa para xogar este domingo en Mérida (12:00 horas): "Fun entrando na Ponferradina. Adestrei toda a pretemporada con eles, á vez que todos os meus compañeiros e estou preparado. Se o míster decide que o domingo teño que saír a xogar, vou dalo todo polo equipo".
Membro dunha familia de futbolistas, co seu pai ex xogador do histórico Albacete Balompé de Primeira División e irmán de dous xogadores en activo en España, Kuki subliña que o DNI "non pesa porque xa desde moi pequeno veño con iso e é algo que xa está dentro de min".
Nesta liña, confesa que o seu pai, "cando veu comigo de Ponferrada dicíame que el estivo co Súper Dépor. Metéronlle 5-1 ou 6-1, non sei canto me dixo. Di que é unha pasada. Eu vino xa o outro día no partido, a afección que ten, como aperta. En Segunda División hai moi poucos clubs, case ningún, con esta afección, con este estadio. E díxome que o Dépor é o Dépor e que aperta, que hai que meterlle cana".
