LaLiga remitiu hai uns minutos a seguinte comunicación a todos os Clubs:
"Segundo información do Consello Superior de Deportes, en referencia á disputa das competicións de fútbol profesional de LaLiga Santander e LaLiga SmartBank, estas serán a porta pechada polo menos as próximas dúas semanas desde hoxe mesmo, manténdonos á espera da comunicación oficial do Goberno da Nación. LaLiga quere engadir ademais que non se valora ningún tipo de suspensión das xornadas co obxectivo de garantir a integridade e a viabilidade económica das mesmas.
Desde hai un mes, LaLiga traballa en plans alternativos en coordinación coa UEFA para que, no caso de que as autoridades sanitarias decretasen a suspensión dos partidos como sucedeu en Italia ou Suíza, dispor dun plan de datas para disputar os encontros.
Non podemos esquecer que nos atopamos nun momento crucial da temporada en ambas as competicións e que, en aras de protexer a integridade e a viabilidade económica da competición, debemos tentar que tanto LaLiga Santander como LaLiga SmartBank finalicen nos prazos establecidos.
Sendo conscientes do prexuízo que isto podería supor para LaLiga e os Clubs e SAD, debemos antepor a saúde por encima de todo.
Como vimos facendo até agora, LaLiga seguirá informando os seus Clubs e SAD das noticias oficiais que vaian acontecendo.
A continuación, LaLiga comunicará o protocolo de actuación a seguir para a disputa dos partidos a porta pechada, indicando o persoal estritamente necesario e debidamente acreditado para o desenvolvemento dos encontros.
O acceso aos estadios estará estritamente reducido ao seguinte grupo:
- Xogadores, corpo técnico e equipo arbitral.
- Xuntas directivas de ambos os equipos.
- Persoal técnico con funcións estritamente relacionadas coa organización do partido cun máximo de 100 persoas (por exemplo, recollepelotas, persoal de mantemento do campo ou persoal de limpeza).
- Delegados de LaLiga, directores de partido, médicos anti-doping e persoal sanitario.
Con respecto ao resto dos medios de comunicación (xornalistas, fotógrafos, operadores e técnicos), seguiremos as recomendacións do Consello Superior de Deportes e as autoridades sanitarias. Nas próximas horas informaremos o protocolo a seguir durante os partidos".
O Real Club Deportivo irá informando de todo o relativo ás afeccións que produce esta medida nas próximas horas a través das súas canles oficiais de comunicación.
