Pablo García Taboada (A Coruña, 23 de xaneiro de 2008), lateral do Cadete de División de Honra, está concentrado coa selección española sub-15, dirixida por José Lana (na foto), no torneo Football Federations Cup, que se xogará en Alacante até o venres 9 de decembro.
Mañá mércores, Arabia Saudita a partir das 17:00 en Benidorm será o primeiro rival dos españois e de Pablo García, no que podería ser o seu debut internacional.
O calendario de España é o seguinte:
Mércores 7 de decembro 17:00: ESPAÑA - ARABIA SAUDITA, no Estadio Guillermo Amor de Benidorm
Venres 9 de decembro 11:00: ESPAÑA - MÉXICO no Estadi Olímpic Camilo Cano da Nucía
Pablo García pertence ao cadro do Cadete que lidera a División de Honra con 5 puntos de vantaxe sobre o segundo clasificado, o RC Celta.
A consecuencia deste torneo, o defensor branquiazul será baixa no partido ligueiro do seu equipo de mañá mércores en Abegondo ante o Pontevedra CF (19:00 horas).
#ANOSACANTEIRA volve estar no punto de mira das categorías inferiores da selección española porque recentemente o dianteiro do Xuvenil A Kevin Sánchez participou coa sub-18 en dous partidos amigables ante Suíza na Cidade do Fútbol de Las Rozas e o atacante do Cadete, José Rey, gañou coa sub-16 o torneo Football Federations Cup.