O Estadio da Cartuja en Sevilla acolleu este mediodía o sorteo do emparellamento da primeira eliminatoria da Copa de SM El Rei que se disputará, a partido único, a semana do 16 de decembro.
Após evitar rivais de Segunda División, o Dépor enfrontarase ao CD El Ejido 2012. O feito de ser equipos da mesma categoría fai que o saír primeiro no sorteo outorgue ao Deportivo o factor campo no cruzamento, polo que o partido disputarase no Estadio ABANCA-RIAZOR en día e hora aínda por determinar.
O CD El Ejido foi fundado no ano 2012 após a desaparición do Polideportivo Ejido e esta temporada milita no Grupo 4 Subgrupo B da categoría de bronce do fútbol nacional, á que ascendeu esta temporada desde Terceira División.
