A atacante Gabriela García 'Gaby' é unha das novidades do Deportivo ABANCA para a visita do Valencia CF Femenino a Abegondo prevista para mañá domingo 25 de abril ás 12:00 (LaLiga Sports TV), en choque correspondente á 27ª xornada na Primera Iberdrola.
Gaby lesionouse a principios de mes no tríceps sural, pero, co adiamento do choque ante o Atlético de Madrid por COVID-19 no equipo madrileño e co parón polos compromisos das seleccións, a dianteira branquiazul só perdeuse o partido do pasado sábado en Barcelona, á marxe da concentración de Venezuela con motivo da Basque Country International Cup.
Incorporouse Gaby aos adestramentos co grupo a principios de semana e xa ten o visto e prace dos Servizos Médicos.
Manu Sánchez tamén recupera a Alba Merino e Ainoa Campo, ausentes en Barcelona o pasado sábado por sanción; do mesmo xeito que Athenea del Castillo, que quedou na Coruña por precaución.
Así mesmo, as canteirás Jessica, Eva Dios, Tati, Carlota, Patri López e María Figueroa entran na convocatoria do Deportivo ABANCA.
Manu Sánchez, en rolda de prensa, explicou as ausencias de Carolina, "que segue a súa recuperación"; Kika, "cunhas molestias musculares"; e Noelia Bermúdez, "cun golpe nun pé".
As valencianas, que se impuxeron no partido de ida (3-0) ás deportivistas, chegan á Cidade Deportiva na zona media da táboa e após derrotar o sábado (2-0) ao Madrid CFF, un rival da parte alta da clasificación.
Finalizado o encontro, o Dépor ABANCA descansará o luns 26 e retoma os adestramentos o martes 27 ás 16:30 en Abegondo.
