O Deportivo ABANCA regresa á competición no grupo norte de Reto Iberdrola coa visita ao CDE Racing Féminas mañá domingo 5 de decembro ás 12:30 no Municipal de Santa Ana, en Tanos (Torrelavega). O encontro corresponde á 11ª xornada e será retransmitido pola canle de Youtube do equipo cántabro.
Miguel Llorente, técnico branquiazul, manifestou ante os medios de comunicación que o "parón se fai moi longo. Temos ganas de xogar e de competir, pero estamos moi ben, como sempre con ganas de xogar, con ganas de ver que o que esteamos a practicar funcione e de seguir adiante coa competición". "Estamos a practicar e adestrando ben, coas nosas ideas, coas nosas cousas; na mesma liña que temos desde o inicio", engade o adestrador branquiazul.
O cadro deportivista conta coas baixas por lesión de Alba Merino, Laura Fernández e Goretti, esta a consecuencia dunhas molestias nun pé. Aroa Guerra e Tati son as representantes de #ANOSACANTEIRA na convocatoria de 18 futbolistas.
O equipo branquiazul chega ao choque segundo na táboa con 25 puntos, a 2 puntos do líder, o Levante Las Planas FC, equipo que visitará Abegondo na última xornada deste ano 2021.
As deportivistas venceron fai quince días ao Oviedo Moderno CF na Cidade Deportiva (2-0) cunha espléndida segunda parte. Ademais, o vestiario celebrou a convocatoria de Ainhoa Marín para a Selección Española Absoluta Promesas (sub-23) con vistas a un amigable xogado o pasado luns no que a atacante do Deportivo ABANCA xogou o último cuarto de hora.
Pola súa banda, o CDE Racing Féminas é décimo terceiro con 8 puntos e está en zona de perigo. Iso si, as santanderinas veñen de empatar a cero en casa do CD Pradejón.
No seu campo de Santa Ana, o cadro racinguista cultivou no que vai de liga un triunfo ante o Atlético de Madrid B (2-1); un empate fronte ao CE Seagull (1-1); e tres derrotas ante RCD Espanyol de Barcelona (0-2), Levante Las Planas FC (1-3) e SE AEM (1-2).
O Dépor ABANCA adestrouse esta mañá e sae a continuación de viaxe por estrada a Santander, con esta folla de ruta:
Sábado 4 de decembro
13:30: Comida no Restaurante Las Tablas (Carral)
19:00 (horario aproximado): Chegada ao Hotel Chiqui Santander
Domingo 5 de decembro
12:30: CDE Racing Féminas - Deportivo ABANCA, no Municipal de Santa Ana (Tanos, Torrelavega)
Ao concluír, regreso en autocar á Coruña
Finalizado o partido, o Dépor ABANCA adestrarase de novo o luns 6 de decembro ás 11:30 en Abegondo.
