Nesta semana sen fútbol porque tocaba visitar ao desaparecido Extremadura UD, o Deportivo cambiou esta mañá o céspede, as porterías e os balóns de Abegondo polo enxeño e destreza mental nunha actividade alternativa.
Se nalgunha ocasión anterior o equipo divertiuse nos karts en Marineda City, hoxe o cadro de xogadores e técnicos realizou un xogo de Escape Room, por xentileza da empresa 'The Rombo Code' situada no polígono coruñés da Grela e especializada en eventos de empresa e celebracións particulares.
En primeiro lugar, Álex Bergantiños, Ian Mackay, Borja Granero e Diego Villares foron os encargados de elixir o resto de membros de cada grupo con Borja Jiménez no papel de xuíz árbitro.
Cada equipo meteuse nunha habitación e tiña un máximo de 60 minutos para, utilizando a lóxica e o traballo en grupo, lograr saír.
O equipo de Álex Bergantiños, integrado por Álvaro Rey, William de Camargo, Rafa de Vicente, Pablo Trigueros, Pablo Brea, Rubén Barreiro (fisioterapeuta) e Álex Santiso (nutricionista) foi o que conseguiu escapar en menor tempo da súa habitación, titulada 'Tralo Espello'.
Foi unha mañá diferente onde reinou máis que nunca o compañeirismo e o bo humor.
O Dépor regresará a Abegondo mañá mércores a partir das 10:30 horas.
