O Dépor exhibe a factoría de Abegondo cun triunfo en Sevilla
var ivPlayer1054094 = new IVPlayer("350", "197",false, "http://www.canaldeportivo.tv/", "/i/player/1342b.gif",IVPlayer.TYPE_JWPLAYER4, "/i/player/skin-depor.swf"); ivPlayer1054094.playVideo('player1054094', 'COPA09-10_1-4_volta_sevilla0-deporti
Lotina advertira que "era de parvos pasar a semifinais". Aínda así, o técnico branquiazul esixiu ao seu persoal realizar un partido serio. E así foi. O Deportivo viaxou a Sevilla a defender a historia dun club Centenario aínda que a eliminatoria quedase sentenciada na ida disputada en Riazor. Seoane debutou no lateral zurdo con boa nota. Juca e Juan Rodríguez colleron o mango ao principio no centro do campo, con Iván Pérez pola esquerda, Pablo Álvarez pola dereita e Juan Domínguez de enganche. Arriba, Bodipo na punta tentando sorprender á zaga andaluza. O primeiro tempo foi de posesión de balón para o Dépor con só algún chispazo sevillista ata o gol de Bodipo, logrado ao fío do descanso.
Na continuación, vendo que o partido seguía polos mesmos camiños, Jiménez sacou á súa artillaría: Jesús Navas e Kanouté. Apareceu entón a figura da meta Manu, que foi un dos grandes protagonistas do partido ao deter todo o que se lle achegaba neses minutos de abafo local. O Sevilla, como todo grande, ten orgullo e cústalle entregar os partidos, aínda que neste caso non tivese transcendencia. No outro banco, Lotina premiou aos máis novos _Dani e Rochela_ co debut oficial no primeiro equipo, algo que non esquecerán na vida polo escenario e por facelo con vitoria nos cuartos de final da Copa do Rei.
Ao final, triunfo do Deportivo que lle fai acabar a súa participación na Copa do Rei cun sorriso. O deportivismo ilusionouse con esta competición, pero sen dúbida a praga de lesións que arrasa o vestiario minguou o potencial do conxunto coruñés.
Sevilla: Javi Varas; Adriano, Marc Valente, Dragutinovic (Escudei, m. 27), Fernando Navarro; Romaric, Lolo, Duscher; Diego Capel, Perotti (Jesús Navas, m. 52); e Luís Fabiano (Kanouté, m. 83).
Deportivo: Manu; Laure, Ze Castro, Piscu, Seoane; Juan Rodríguez, Juan Domínguez; Pablo Álvarez (Adrián, m. 80), Juca (Rochela, m. 70), Iván Pérez; e Bodipo (Dani, m. 66).
Gol: 0-1, m. 44: Bodipo.
Árbitros: Fernando Teixeira Vitienes (Comité Cántabro). Amoestou por parte do Deportivo a Piscu, Juan Rodríguez e Laure.
