Conscientes da esixencia que implica a todos os niveis un partido no Estadio Santiago Bernabéu, como o deste domingo 21 de xaneiro ante o Real Madrid (16:15 horas, Bein LaLiga) en choque da 20ª xornada de LaLiga Santander, os técnicos do Deportivo mantiveron esta mañá unha alta intensidade no adestramento, no campo 2 da Cidade Deportiva, tal e como vén ocorrendo ao longo desta longa semana de preparación.
Así, após un quecemento, o cadro, cos fabrilistas Edu Expósito, One e Lucas, realizou un traballo de posesión e fútbol en espazo reducido. Un traballo táctico baixo a supervisión directa de Cristóbal Parralo, que impartiu constantes instrucións, e un partido a tres cuartas partes de campo puxeron o punto e final ao intenso traballo sobre o céspede.
Ademais de Fede Cartabia, adestráronse á marxe Raúl Albentosa e Sidnei, que quedou cos fisioterapeutas debido a unhas molestias na súa coxa esquerda. Os Servizos Médicos do Club agardan á súa evolución nas próximas horas.
Mañá venres, o cadro está citado ás 11:00 horas en Abegondo.
