O Deportivo caeu pola mínima na súa visita á Cultural y Deportiva Leonesa, rompendo así a súa serie sen coñecer a derrota, que se quedou en 7 partidos, no encontro que pechou a primeira volta.
Comezou enchufado o Dépor, que aos 20 segundos acariñou o gol nunha internada pola dereita de Paris Adot que non atopou rematador. Antes de cumprirse o minuto 2, Lucas cabeceou desviado un centro de Yeremay.
A presión alta do conxunto coruñés puxo en moitos apuros ao equipo leonés, que até o minuto 23 non pisou a área visitante. Escudero recuperou un balón longo a pés de Paris Adot e serviu en profundidade para Muguruza, que empalmou un forte dereitazo desde o bordo da área que se foi alto.
Recentemente superada a media hora, un contragolpe leonés concluíu cun zurdazo cruzado de Escudero que após rozar en Pablo Vázquez saíu lambendo o pau a saque de esquina. Nese córner, Pablo Martínez sufriu un golpe durísimo na caluga, cando Rodri Suárez entraba ao remate, que deixou xeada á bancada do Reino de León. Por sorte, o francés levantouse e saíu polo seu propio pé, aínda que pouco despois tivo que ser substituído por Ximo Navarro.
A Cultural apertou nos minutos finais do primeiro período. No minuto 42, Berto gañou a carreira a Ximo Navarro no extremo esquerdo e serviu ao punto de penalti, onde Martín Solar controlou, pensou e disparou con todo a favor pero Germán desviou a córner o seu dereitazo, practicamente un penalti en movemento, nunha gran intervención.
A formación leonesa adiantouse no marcador xusto cando ía cumprirse o minuto 45. Álvaro centrou ao segundo pau após gañar un balón dividido a Salva Sevilla no vértice da área e Muguruza, completamente só, fusilou ao primeiro toque a Germán.
O Dépor non acusou o golpe e no terceiro minuto de engadido estivo a piques de devolver a paridade ao marcador, nun centro de Paris Adot que atopou o remate coa dereita de Davo. O balón perdeuse moi preto do pau dereito da portería local con Miguel Bañuz completamente batido.
A segunda metade comezou cunha clara oportunidade para Davo, no minuto 49. A cabezada do asturiano a centro de Balenziaga foise moi desviada. Case de inmediato respondeu o equipo leonés, cun zurdazo moi desviado de Álvaro.
Salva Sevilla probouno cun dereitazo dende moi lonxe no minuto 55. Miguel Bañuz detivo o esférico con moitas dificultades en dous tempos. Dous minutos despois, Yeremay caracoleou sobre a liña de fondo, pero o seu centro-chute raso desviouno a córner coas pernas o gardameta local. E no minuto 60, unha parede entre Davo e Yeremay acabou con disparo raso do primeiro que capturou Miguel Bañuz.
A Cultural puido ampliar a súa vantaxe no minuto 62, cando Escudero cabeceou un saque de esquina que desviou lixeiramente Germán antes de estrelarse no traveseiro.
O Deportivo seguiu buscando o empate. No minuto 71, un dereitazo cruzado raso de Yeremay desviouno o porteiro local. No 73, outro dereitazo de Hugo Rama, este na media lúa á saída dun córner, golpeou nun defensor e foise a córner sacando achas do poste esquerdo da portería leonesa. Ese mesmo córner, buscouno moi pechado Lucas e a madeira repeleu a pelota.
A dez minutos para a conclusión, Barbero entrou por Balenziaga, volvendo así a saltar ao céspede case catro meses despois de lesionarse en Salamanca. O Dépor acabou con tres centrais (Ximo, Pablo Vázquez e Jaime), con Hugo Rama por diante, Paris e Mella nos carrís, Davo, Lucas e Yeremay na liña de mediapuntas e Barbero como xogador máis adiantado.
A pesar do ofensivo desa disposición, os branquiazuis apenas lograron xerar perigo e expuxéronse aos contragolpes leoneses. Como o que se produciu no minuto 87, cando Ximo Navarro cruzouse ante o disparo de Escudero.
Xa en tempo engadido, Davo foi obxecto dun claro penalti por parte de Jaume Pol, que agarrou ao dianteiro deportivista dando as costas á pelota. O colexiado, con todo, castigou a acción con falta do xogador branquiazul.
Finalizou o encontro coa oitava vitoria consecutiva no seu campo da Cultural y Deportiva Leonesa, que suma 24 puntos de 27 posibles no estadio Reino de León. O Deportivo, pola súa banda, puxo fin a unha serie de 7 partidos sen perder (4 vitorias e 3 empates) e pecha a primeira volta con 29 puntos, na sexta posición.
Cultural y Deportiva Leonesa: Miguel Bañuz, Víctor García, Rodri Suárez, Quique Fornos (Aleix Coch, min. 66), Álvaro (Jaume Pol, min. 80), Martín Solar, Kevin Presa, Bicho (Guillermo, min. 80), Calderón (Muguruza, min. 17), Escudero e Berto (Diego Barri, min. 66).
RC Deportivo: Germán, Paris Adot, Pablo Vázquez, Pablo Martínez (Ximo Navarro, min. 37), Balenziaga (Barbero, min. 80), Rubén López (Mella, min. 63), Jaime, Salva Sevilla (Hugo Rama, min. 63), Davo, Lucas e Yeremay.
Gol: 1-0 Muguruza (min. 45).
Árbitro: Manuel Ángel Pérez Hernández (c. madrileño). Cartón amarelo a Davo (min. 40), Berto (min. 43), Ximo Navarro (min. 63), Balenziaga (min. 65), Hugo Rama (min. 75) e Miguel Bañuz (min. 82).
Incidencias: partido correspondente á 19ª xornada do grupo 1 de Primera Federación disputado no estadio Reino de León ante 8.653 espectadores, con máis de 2.000 deportivistas nas bancadas.
