O Deportivo citou a todos os dispoñibles, incluídos os fabrilistas Adri Castro e Juan Rodríguez, para recibir mañá domingo 8 de novembro en ABANCA-RIAZOR ao Coruxo FC (12:00 horas, TVG), en partido correspondente á 4ª xornada do subgrupo A do grupo 1º de Segunda División B.
Quedan fóra da convocatoria os lesionados Eneko Bóveda, Salva Ruiz e Derik, todos defensas. "Non lembro que me pasase na miña carreira profesional que lateral dereito, lateral esquerdo e dous centrais estean fóra do equipo", dixo onte en rolda de prensa Fernando Vázquez en alusión tamén ás molestias nun xeonllo de Borja Granero, que finalmente puido entrar na convocatoria. "Iso limita bastante a un adestrador e limita o rendemento do equipo", engadiu.
Recoñeceu o técnico deportivista que o equipo "está escaso de efectivos nesta demarcación pero inventaremos algo se seguimos tendo problemas".
Espera o adestrador branquiazul que á volta do parón ligueiro da próxima fin de semana, "Salva e Eneko poidan chegar. Derik pode estar xusto. Os dous laterais incorporaranse sen problema para o próximo partido (en Guijuelo a fin de semana do 21 e 22 de novembro)", finalizou.
No adestramento desta mañá, Fernando Vázquez dispuxo após un quecemento uns rondos, un exercicio táctico e un partido a metade do campo 2.
Os futbolistas citados chegarán a ABANCA-RIAZOR mañá domingo ás 10:30 horas. Finalizado o choque ante o Coruxo FC, o cadro regresará aos adestramentos o luns 9 de novembro ás 11:00 en Abegondo.
