O Deportivo, hoxe ademais co meta fabrilista Alberto, regresou esta mañá os adestramentos xa coa mente posta na visita ao CD Guijuelo prevista para este domingo 22 de novembro no Estadio Municipal de Guijuelo (17:00 horas, Footters), correspondente á 5ª xornada no subgrupo A do grupo 1º de Segunda División B.
Incorporáronse ao grupo futbolistas que a semana pasada estiveron á marxe do grupo, caso de Héctor, Borja Granero ou Lucho García. Con Celso Borges de viaxe de regreso á Coruña despois de disputar dous partidos amigables con Costa Rica, unicamente Derik, Valín e Adri Castro realizaron un adestramento específico, os dous primeiros na Cidade Deportiva.
No caso do dianteiro fabrilista, habitual nos adestramentos co primeiro equipo, farao no seu domicilio, posto que estará illado dez días após ser contacto estreito cunha persoa que deu positivo en COVID-19. Aínda que a súa PCR foi negativa, Adri Castro terá que gardar a pertinente corentena, tal e como estipulan as autoridades sanitarias.
Na sesión desta mañá, após un circuíto físico e rondos, Fernando Vázquez dispuxo unha serie de exercicios tácticos orientados ás peculiares características do Estadio Municipal de Guijuelo. Un partido a metade do campo 3, en espazo reducido, puxo o punto e final ao adestramento sobre o céspede.
Mañá mércores haberá un novo adestramento a partir das 10:30 na Cidade Deportiva de Abegondo.
