O Deportivo segue vivo na Copa del Rey ao derrotar por 0-2 ao CE Sabadell FC este xoves 4 de decembro na Nova Creu Alta, en choque correspondente á segunda rolda.
Antonio Hidalgo subliñou na sala de prensa que "nos puxeron en moitos problemas" e cualificou o encontro de "moi igualado".
Os Nosos continúan nunha esixente semana de competición, de "moito traballo" como lembra o técnico deportivista, con visita en liga ao Carlos Belmonte de Albacete o pasado sábado 29 de novembro e partido en ABANCA-RIAZOR ante o CD Castellón o domingo 7 de decembro ás 18:30 horas (LaLiga TV Hypermotion e Fútbol 2, dispoñible en DIGI TV e outras plataformas).
Na primeira rolda, o Dépor apeou á UD Sámano ao vencer en Castro Urdiales por 1-4.
Os arlequinados superaron á UD Poblense após gañar por 1-2 en La Puebla (Mallorca).
Causaron baixa para a Nova Creu Alta os tocados Ximo Navarro, Escudero, Daniel Bachmann e Luismi Cruz.
Ademais, dirixiu ao equipo desde a banda Ignasi Salafranca ao cumprir Antonio Hidalgo o seu segundo e último partido de sanción.
Precisamente o encontro foi especial para o adestrador blanquizul, cuxa residencia familiar está a escasos quilómetros do estadio arlequinado e dirixiu ao CE Sabadell FC desde o 3 de abril de 2019 ao 21 de novembro de 2021, cun total de 96 encontros no banco, incluído un ascenso a Segunda División.
Antonio Hidalgo, que confesou ser socio e abonado do CE Sabadell FC, foi cariñosamente homenaxeado nos prolegómenos do partido e, entre o aplauso de toda a bancada posta en pé, recibiu unha camiseta do club da súa vida.
Samu, Íker Vidal, Bil, Damian Canedo, Quique Teijo e Fabi foron os representantes de ANOSACANTEIRA na convocatoria.
Pola súa banda, o CE Sabadell FC marcha en 3ª posición no grupo 2º de Primera Federación con 23 puntos.
A pasada fin de semana, no seu choque ante a CE Europa, cultivou a súa primeira derrota (2-0) no que vai de temporada.
Dépor e CE Sabadell FC víronse as caras por última vez na Nova Creu Alta o 22 de outubro de 2023 en partido da 9ª xornada de Primera Federación. Naquela ocasión venceron os branquiazuis por 0-1 con gol de Martín Ochoa aos 7 minutos.
Respecto da liga disputada o pasado sábado en Albacete, Antonio Hidalgo dispuxo até 9 caras novas no once inicial. Unicamente repetiron Loureiro no lateral dereito e Patiño no centro do campo.
Rubén López foi o lateral zurdo mentres que Samu debutou en partido oficial no centro da defensa.
A primeira ocasión de perigo foi para o Dépor. Cristian Herrera, situado en banda dereita, recibe de Fabi totalmente só e o seu disparo sácao Diego Fouli. O rexeite chégalle a Loureiro, pero o seu chute sácao a defensa catalá. Corría o minuto 4.
Respondeu o CE Sabadell FC aos 8 minutos cun remate fóra por pouco de Ton Ripoll ao segundo pau.
Aos 12 minutos de novo Diego Fouli saca un bo disparo de Fabi, esta vez após recibir de Eddahchouri en banda dereita.
"Tivemos 2 boas ocasións nada máis empezar, cunha estrutura que tiñamos controlada. Logo cambiaron de estrutura e estábanos custando un pouco máis. Iso fala da riqueza táctica do CE Sabadell FC", declarou o técnico deportivista.
Pasada a media hora puido adiantarse no marcador o conxunto arlequinado. Nun saque de falta lateral o balón cae na área a Bonaldo pero o seu disparo, raso, márchase rozando o pau esquerdo da meta de Eric Puerto entre un bosque de pernas.
Con igualdade máxima chegouse ao descanso.
Após o paso polos vestiarios, Dani Barcia relevou a Lucas Noubi, que sufriu molestias estomacais.
A defensa do Dépor foi completamente galega, con Loureiro, Samu, Dani Barcia e Rubén.
O primeiro disparo foi catalán aos 48 minutos. Quadri aprovéitase dunha mala saída de balón deportivista pero o seu disparo, raso, sae desviado.
Adiantouse o Dépor aos 54 minutos. Loureiro rouba en defensa, métese na área e mete un centro á área que cabecea só Cristian Herrera á rede.
O gol deixou tocado aos arlequinados e Os Nosos puideron aumentar a vantaxe nun saque de esquina que Gragera no segundo pau cabeceou ás mans de Diego Fouli.
"Co gol atopámonos mellor", subliñou o preparador branquiazul.
Aos 65 minutos, Javi López-Pinto xuta ás mans de Eric Puerto.
Antonio Hidalgo dá entrada a Mella e a Bil, que debutaba así no primeiro equipo, por Fabi e Eddahchouri.
Mella tivo na súa cabeza o 0-2 aos 75 minutos pero a súa cabezada no segundo pau sácao Diego Fouli.
Apertaba o CE Sabadell FC en busca do empate. Mario Soriano substitúe a Mulattieri, deixando só a Bil en punta.
"Coa saída de Mario empezamos a ter máis balón. Logo veu o 0-2 e xa quedaron con 10", apuntou o adestrador de Os Nosos.
O Dépor encarrila a eliminatoria cunha gran transición que culmina Rubén López no minuto 79.
O tramo final deixou o debut doutro canteirán. Damián Canedo relevou a Samu no minuto 83.
Aínda por riba, o CE Sabadell FC quedou cun xogador menos posto que Kaiser, lesionado, non puido seguir no campo. Os arlequinados realizaran todos os seus cambios.
Así pois houbo un final plácido para o Dépor, que se asegura unha terceira rolda en ABANCA-RIAZOR ante un rival de Primera División.
CE Sabadell FC: Diego Fuoli, Genar Fornés (Sergi Segura, min. 71), Arthur Bonaldo, Ton Ripoll, Miguelete (Agustín Coscia, min. 71), Rubén Martínez (Rodrigo Escudero, min. 60), David Astals, Kaiser, Urri, Quadri (Sergio Cortés, min. 81) e Priego (Javi López-Pinto, min. 60)
Deportivo: Puerto, Loureiro, Noubi (Dani Barcia, min. 46), Gragera, Samu (Damián Canedo, min. 83), Patiño, Rubén López, Cristian Herrera, Fabi (Mella, min. 65), Eddahchouri (Bil, min. 65) e Mulattieri (Mario Soriano, min. 77)
Árbitro: Alonso de Ena Wolf, do comité aragonés. Amoestou a Miguelete (min. 67), Urri (min. 71) e Mario Soriano (min. 82)
Goles: 0-1 Cristian Herrera (min. 54); 0-2 Rubén López (min. 79)
Incidencias: partido disputado na Nova Creu Alta con presenza duns 200 afeccionados deportivistas