Borja Jiménez sorprendeu esta mañá ao cadro do Deportivo. Tal e como estaba previsto na planificación que coñecen os futbolistas desde a pasada fin de semana, os xogadores estaban citados hoxe xoves ás 09:00 para almorzar. Logo habería un traballo preventivo supervisado por Álex Canosa e a continuación, adestramento sobre o céspede da Cidade Deportiva como cada mañá.
Con todo, o técnico deportivista reuniu ao seu cadro despois do almorzo e comunicoulles que esta mañá o traballo ía ser totalmente diferente, grazas á colaboración de Karting Marineda. "Era algo que tiñamos xa pensado. Faltaba situalo no día. Queriamos facer unha actividade fóra do que é o campo. Levabamos moitas sesións. Quédanos unha semana aínda con adestramento-partido, adestramento-partido. Viñamos de dúas sesións con carga moi intensa. O xogador estaba canso. Buscabamos iso, as risas que supón estar noutro contexto diferente, ver quen era rápido, quen non. Foi divertido", explicou Borja Jiménez en rolda de prensa.
Até o Centro Comercial coruñés desprazáronse xogadores e técnicos para pasar unha mañá diferente, con risas e diversión na recta final desta pretemporada. En grupos de cinco fóronse desenvolvendo as carreiras, de oito minutos de duración. Os mellores de cada unha disputaron unha última carreira final: Borja Jiménez, Gandoy, Álex Bergantiños, Alberto Benito e Adrián Lapeña. De aí saíu o podio final. Borja Jiménez, cuxa familia está moi vinculada ao automobilismo na súa terra, Castela e León, emulou a Lewis Hamilton e cunha condución agresiva e sen erros na trazada, foi o máis rápido e subiu todo o máis alto do caixón: "Está claro que son o condutor do Dépor", chanceou o técnico deportivista, micrófono en man, na entrega de premios á que asistiu todo o equipo. Gandoy e Álex Bergantiños foron segundo e terceiro respectivamente. O capitán agradeceu ademais "o traballo enorme da miña escuadra", emulando a Fernando Alonso após acabar calquera Gran Premio do Mundial de Fórmula Uno.
Esta actividade hoxe en Karting Marineda variou a planificación de traballo do equipo. Así, a pesar de haber partido amigable mañá venres 20 de agosto no campo de O Espiñedo ante o CD Arenteiro (19:00 horas) e o sábado 21 de agosto no campo de Vista Alegre de Ordes fronte ao Pontevedra CF (19:00 horas), o equipo adestrarase cada mañá ás 10:30 en Abegondo, con almorzo previo ás 09:00. Ao finalizar cada adestramento, Borja Jiménez fará pública a lista de convocados para cada partido.
