O Fabril certificou a permanencia no grupo 1º de Segunda Federación ao vencer este mediodía (1-2) ao Real Oviedo Vetusta no último partido de liga.
O filial conclúe pois a temporada con 44 puntos na 9ª posición da táboa, após 11 partidos gañados, 11 empatados e 12 perdidos; e cun balance de 48 goles a favor e 47 en contra.
Após o empate da pasada fin de semana en Abegondo fronte ao Pontevedra CF logrado polos granates no tempo de desconto, o conxunto de Óscar Gilsanz chegaba a este último partido 10º con 41 puntos, 2 puntos por encima da posición de play out. Ademais dos fabrilistas xogábanse esa praza de promoción o Racing Villalbés, RS Gimnástica de Torrelavega, Real Avilés Industrial e Coruxo FC nun fenomenal atasco na zona perigosa da táboa.
As contas eran sinxelas, puntuar para selar a permanencia sen depender resultados de terceiros partidos.
Óscar Gilsanz recorreu no Requexón ao seu once tipo, o habitual esta temporada sempre que as lesións o permitiron fronte a un Vetusta xa descendido a Tercera Federación aínda que con xogadores de moita calidade que mesmo chegaron a debutar no primeiro equipo en Segunda División.
Os primeiros minutos foron para os carbayones. Sen crear moito perigo, si dominaban territorialmente o xogo.
No entanto, o Fabril foi o que dispuxo das mellores ocasións, primeiro cun remate de chilena de Kevin Sánchez que se marcha a córner após tocar nun defensor; unha cabezada de Puerto lixeiramente alto no saque de esquina consecuente; e un disparo de Kevin de socato que sacou a meta Viktor Egboh nunha gran parada. Todo iso do minuto 17 ao 19 nun arreón fabrilista.
Respondeu o Oviedo Vetusta cunha xogada culminada por Nacho Estrada nun disparo alto desde a interior da área.
Pouco despois chegou o primeiro gol do partido. Lamine escápase en velocidade por banda dereita e o seu pase ao corazón da área rematouno Santi Miguélez a pracer, libre de marca.
Sentían máis cómodos os asturianos, sen presión clasificatoria ao estar xa descendidos.
Pero cando mellor estaba o Vetusta chegou o empate. O filial deportivista saca un córner en curto, Diego Gómez mete un balón á área e a meta Viktor Egboh golpea a Puerto que se aprestaba ao remate. O colexiado do encontro non o dubidou e sinalou a pena máxima; ademais de ensinar o cartón amarelo á meta local.
Diego Gómez non fallou e enganou ao porteiro no lanzamento. Era o minuto 36 e ambos os equipos volvían ao momento de saída.
Pouco despois, o partido cambiou de rumbo definitivamente. O defensor Jaime cede demasiado curto ao seu porteiro, Kevin adiántase e Viktor Egboh ten que cometer outro claro penalti sobre o internacional deportivista, coa consecuente amarela, a súa segunda no partido.
Marco, a meta suplente, atalla o penalti a Nájera segundos despois de saltar ao campo. Corría o minuto 39 aínda que xa o Oviedo Vetusta quedaba con 10 futbolistas.
Ademais, o atacante rioxano da Fabril emenda o seu erro 2 minutos máis tarde. Recibe de Jairo na área libre de marca e bate, esta vez si, a meta do Vetusta.
Cun xogador máis e o marcador a favor, o Fabril fíxose co mando do partido. Con posesións longas e algún achegamento perigoso como un saque directo de córner que obrigou á meta Marco a intervir chegouse ao descanso.
Após o paso polos vestiarios, o encontro seguiu coa mesma tónica: o balón era do filial deportivista cun rival acazapado no seu campo á espera dalgunha contra.
Diego Gómez tentouno no minuto 57 cun disparo raso e duro desde a frontal que atalla Marco.
O Vetusta tentou refrescar o equipo cun triplo cambio pero os de Óscar Gilsanz xestionaron á perfección a súa superioridade numérica.
Os asturianos buscaron sorprender por velocidade como un remate de Dieguito que se marcha lixeiramente desviado. Era o minuto 67.
Pouco despois, Omar desde fóra da área nunha mala saída de balón do Fabril na que puido haber falta sobre Jairo, pon en apertos a Hugo Ríos aínda que o seu disparo colocado foise lixeiramente alto.
Co paso dos minutos foi decaendo o ritmo froito do cansazo. O cadro de Óscar Gilsanz limitouse a ir deixando pasar os minutos para cumprir o obxectivo, que o preparador fabrilista non dubida en cualificar como "moi importante para o Club e para os futbolistas".
Martín Ochoa tivo nas súas botas o terceiro do seu equipo pero Marco evitouno cunha gran parada no minuto 80.
De forma plácida concluíu a liga para o Fabril, co obxectivo cumprido de seguir a próxima temporada en Segunda Federación.
Real Oviedo Vetusta: Viktor Egboh, Lamine, Osky (Darío, min. 88), Eddey, Yayo, Víctor Blanco (Marco, min. 39), S. Miguélez (Xavi Sola, min. 63), Sesé (Omar Falah, min. 63), Nacho Estrada (Dieguito, min. 63), Charbel e Jaime V.
Fabril: Hugo Ríos, Lache (Mati Castillo, 90+2), Álex Pereira, Puerto, Marotías, Brais Val (Barba, min. 78), Álex Alfaro, Jairo, Nájera (Mardones, min. 64), Diego Gómez (Thymos, 90+2) e Kevin Sánchez (Martín Ochoa, min. 64)
Goles: 1-0 Santi Miguélez (min. 22); 1-1 Diego Gómez (min. 36); 1-2 Nájera (min. 41)
Árbitro: Carlos Pérez Fernández, do colexio castelán-leonés. Amoestou a Viktor Egboh (min. 33 e 36), Nájera (min. 45+3) e Mardones (min. 88); ademais da David Lagar, segundo adestrador fabrilista.
Incidencias: Partido correspondente á última xornada en Segunda Federación disputado no campo principal do Requexón
