En busca da primeira vitoria no grupo 1º de Segunda Federación. Así encara o Fabril a visita á Cidade Deportiva da Arandina CF mañá domingo 27 de abril ás 12:00 (Youtube RC Deportivo, TVG-2), correspondente á 4ª xornada en Segunda Federación.
O filial branquiazul chega ao partido en 15ª posición con 2 puntos, froito dos empates en Avilés e Luanco.
O equipo realizou esta mañá a súa última sesión de traballo previa ao partido aínda que Óscar Gilsanz estará pendente dos fabrilistas que entraron na lista do Dépor para recibir esta tarde en ABANCA-RIAZOR á UE Cornellà: Martín Ochoa, Jairo, Diego Gómez e Mati Castillo.
Insiste en que "nós estamos para poder axudar no que podamos como filial que somos. E así imos traballando durante a semana".
"Para todos os que traballamos aquí, calquera xogador da canteira e sobre todo este grupo de xogadores que está a chegar e que todos levan moitos anos aquí é un motivo de satisfacción. Creo que estamos nun bo momento, no mellor momento en canto a achega de xogadores no primeiro equipo. Esa liña é moi boa e moi satisfactoria para todos", comentou respecto diso en rolda de prensa o adestrador fabrilista.
Óscar Gilsanz citou a todo o seu cadro mañá, coas únicas baixas de Hugo Ríos, que se recupera dunha fractura de esternón; e de Quique Teijo, dunha lesión de xeonllo. Os xuvenís Kevin, Manu Berrocal e Rodrigo completan a convocatoria.
Desexa sumar o tres puntos "porque sería un motivo de confianza para os xogadores, e que se vexa un bo equipo e un bo partido".
Pola súa banda, a Arandina CF, outro recentemente ascendido, marcha na 11ª posición con 4 puntos. Os burgaleses preséntanse en Abegondo despois de empatar (0-0) a pasada fin de semana no seu campo co Ourense CF.
Na súa única saída esta temporada, o pasado día 10, caeu no Estadio de San Lázaro - Vero Boquete de Santiago (4-2).
Álex Izquierdo, adestrador da Arandina CF, subliñou que "a competición nos está demostrando a igualdade que hai. A xornada pasada só en 1 dos 9 resultados houbo diferenza de máis dun gol. Enfrontámonos a un equipo (o Fabril) que quere sumar a súa primeira vitoria en casa. Nós viaxamos coa idea de sumar a nosa fose do Estadio Juan Carlos Higuero onde o equipo vai ter a posibilidade de facelo se é capaz de manter o nivel competitivo que está a facer".
Lembra que en Santiago de Compostela "tivemos 5, 10 minutos que nos penalizaron moito pero a imaxe que deu o equipo foi moi positiva, estivemos moi preto de sumar alí. Imos convencidos a, se somos capaces de adaptarnos á Cidade Deportiva, o equipo vai poder traerse algo positivo".
Cualifica ao Fabril como "un filial ao uso, con xogadores moi novos, adaptados á súa posición, moi veloces, moi fortes e cunha calidade técnica moi alta. Tentarán levar a iniciativa a través da posesión da pelota. Estamos a preparar o partido desde esa perspectiva".
Pola súa banda, o futbolista Sergio Santacruz lembrou que en Santiago "fixemos as cousas moi ben. Fixemos un partido bastante completo e non se puido sacar. Imos á Coruña confiados en que o podemos facer".
O Club mantén activo o protocolo de apertura con rexistro de asistentes da Cidade Deportiva.
Poden retirar entradas dispoñibles, até esgotar aforamento e sen ningún custo adicional, os socios e socias do RC Deportivo que o tramiten formalmente a través da web bancada.rcdeportivo.es, na que deberán introducir a súa ID de socio e os 4 últimos números do DNI. A continuación, seleccionar unha localidade libre na bancada e posteriormente completar os seus datos de contacto e a dirección de correo electrónico onde recibir a entrada.
Con eses mesmos datos doutros socios e socias, unha única persoa pode retirar máis dunha entrada nunha soa xestión e, deste xeito, seleccionar asentos contiguos ou próximos.
Este procedemento ten dous fins: poder solicitar e recibir a entrada e, ademais, levar un control de repartición e localización na instalación.
O RC Deportivo solicita que unicamente tramiten a entrada aquelas acodes socias que vaian poder acudir ao partido, para evitar que queden afeccionados sen poder asistir unha vez completado a repartición do aforamento nun proceso 100 % telemático.
Está habilitado simultaneamente o sistema de venda de entradas para o público en xeral, a través da mesma plataforma bancada.rcdeportivo.es e seguindo o preceptivo sistema de rexistro e pago de localidade. O prezo de cada entrada para afeccionados sen carné do RC Deportivo é de 10 euros.
