Coa finalización da Tempada 2016-2017 o 30 de xuño, conclúe tamén a esponsorización técnica de Lotto ao Real Club Deportivo, unha relación nada en 2009. Desde aquel verán, a marca italiana vestiu a todos os equipos do Dépor, deixando camisetas para o recordo e a historia do conxunto branquiazul.
O Real Club Deportivo quere agradecer sinceramente a Lotto Sport Italia, referencia na produción e distribución de calzado, equipamento e accesorios deportivos, apostar polo Dépor e ser un compañeiro de viaxe fiel, especialmente nos momentos máis delicados destes últimos 8 anos nos que o equipo estivo en dúas ocasións en Segunda División. Do mesmo xeito, quere dar as grazas a todos os profesionais de Lotto xunto aos que se traballou neste período.
Desde o último ascenso, grazas á colaboración estreita co departamento de imaxe do Deportivo, Lotto conseguiu plasmar nas camisetas, principal símbolo dun equipo, o sentimento branquiazul, deportivista e galego, superándose temporada a temporada ata a guinda destas última campañas coa camiseta que representa a bandeira de Galicia e a peza Orixe 1906. A firma italiana plasmou fielmente os deseños e ideas expostas desde A Coruña para facer que o deportivismo lucise, con máis orgullo se cabe, #asnosascores.
Por todo iso, o Club, ademais de agradecer este patrocinio técnico durante 8 anos, quere desexar á compañía moita sorte en todos os proxectos deportivos nos que está inmerso.
