RCDeportivo RCDeportivo RCDeportivo
Skip to main content
PORTADA

O Unionistas de Salamanca CF, rival do Deportivo na segunda rolda da Copa do Rei

O Unionistas de Salamanca CF será o rival do RC Deportivo na segunda rolda da Copa do Rei, tralo sorteo efectuado este mediodía no Salón Luis Aragonés da sede da Real Federación Española de Fútbol na Ciudad del Fútbol de Las Rozas (Madrid).

A eliminatoria, a partido único como se disputará toda a Copa do Rei esta campaña, xogarase o sábado 11 ou domingo 12 de xaneiro, nunha fin de semana no que non haberá campionato ligueiro ao disputarse a Supercopa de España.

O equipo salmantino, que agora mesmo ocupa a última posición do Grupo 2 de Segunda B, eliminou na primeira rolda ao Atlético Baleares (1-0), líder destacado do Grupo 1 de Segunda B.

Deportivo e Unionistas víronse as caras na pretemporada do presente curso. Foi o pasado 7 de agosto, con motivo do trofeo Ramón Losada, en Luarca (Asturias). O encontro decidiuno un solitario gol de Christian Santos no minuto 38 (0-1).

Deste xeito, o Deportivo visitará as Pistas do Helmántico, terreo de xogo do Unionistas, por primeira vez na súa historia como equipo de fútbol. Previamente fíxoo en varias ocasións co seu equipo de atletismo, a finais dos anos 70 e comezos dos 80, con motivo de diversas xornadas da Liga Nacional de Clubs de atletismo. Na imaxe superior (cedida por vidaatleticadegalicia.org), Isidoro Hornillos vencendo nas Pistas do Helmántico (ao fondo pode distinguirse a cuberta do veciño Estadio Helmántico) vestindo a camiseta do Deportivo.