Segundo o sorteo celebrado onte na sede da Federación Española de Fútbol en Las Rozas (Madrid), o Xuvenil A medirase ao Osasuna nos oitavos de final da Copa do Rei.
O partido de ida xogarase o domingo 14 de maio en Abegondo e a volta, o 21 en campo osasunista.
O Xuvenil A accedeu á competición copeira como un dos mellores terceiros dos sete grupos da División de Honra. Sumou 67 puntos no Grupo 1 (Galicia, Asturias e Cantabria), só superado polo Sporting de Gijón (69 puntos) e o Celta (74 puntos). Gañou 20 partidos, empatou 7 e perdeu 3, cun balance de 86 goles a favor e 35 en contra.
Pola súa banda, o Osasuna foi campión do Grupo 2 (País Vasco, Navarra, A Rioxa e nordeste de Castela e León). Sumou 68 puntos, con 21 partidos gañados, 5 empatados e 4 perdidos; cun balance de 70 goles a favor e 35 en contra. Os osasunistas superaron a canteiras de prestixio como a do Athletic Club (terceiro) ou a Real Sociedad (cuarto clasificado).
Xuvenil A e Osasuna víronse as caras esta pasada Semana Santa na final da Oviedo Cup. Ao final do tempo regulamentario houbo empate sen goles nun duelo moi equilibrado. Nos penaltis, foron máis certeiros os navarros (4-5), e levaron o trofeo.
