Roberto Olabe, que hoxe disputou o seu primeiro partido completo co Dépor, atendeu aos medios de comunicación na improvisada zona mixta sobre o céspede de Ponte dos Brozos.
O centrocampista branquiazul fala "dun partido máis, unha vitoria máis, que tamén é importante afacerse a gañar. Hai cousas que mellorar, outras que melloramos. É importante saber o que se fai mal para liquidalo. Na segunda metade estivemos un pouco máis equilibrados en todos os sentidos".
A nivel individual recoñece que "me custou un pouquiño" despois de estar varias semanas á marxe do grupo: "É verdade que traballei moi ben cos Servizos Médicos pero despois dunha lesión muscular sempre custa un pouco máis coller o ritmo".
Por iso cualifica o partido de hoxe como "90 minutos importantes para ir collendo sensacións de competición. Estou moi contento porque as sensacións foron boas. Hai que seguir traballando para estar en mellores condicións a semana que vén".
Subliña que "o nivel dos meus compañeiros é moi bo. O día a día é espectacular. Ímonos a esixir moitísimo e vai ser unha das claves do éxito deste equipo".
Esta tarde atopouse "moi cómodo" no dobre pivote con Rubén Díez aínda que advirte que "nos temos que ir coñecendo máis".
Finalmente, Olabe afirma que "nos preparamos para xogar o sábado ante o DUX. Non pensamos en que non vaian vir. Temos claro que o sábado xogamos e o que vaia a pasar que pase".
