Raquel García Yagüe (Madrid, 22 de abril de 1997) asinou esta mañá na sede do RC Deportivo da praza de Pontevedra, co presidente do Club, Antonio Couceiro, a súa renovación como xogadora do Dépor ABANCA até xuño de 2023.
A canteirá do Atlético de Madrid acumulou esta campaña 29 partidos en Liga, todos eles como titular, sendo sustituída tan só no último encontro fronte ao Atlético de Madrid e vendo unicamente 3 amoestacións a pesar da súa posición no terreo de xogo. As estatísticas as completa cos dous encontros de Copa da Raíña que disputou completos, ademais do definitivo de playout fronte ao Real Unión de Tenerife.
A defensa madrileña, primeira futbolista desa comunidade na historia do Dépor ABANCA, sumará a súa terceira temporada en Reto Iberdrola, após o seu paso polo Granada CF, ademais das dúas de experiencia en Primeira co Málaga CF e o EDF Logroño.
Esta renovación súmase ás asinadas con anterioridade por Ainhoa Marín, Inés Altamira e Paula Gutiérrez, outras das futbolistas con maior participación no equipo na presente temporada.
