Alberto Retuerta foi presentado en Abegondo como novo xogador do Dépor para as dúas próximas temporadas, con opcións futuras.
En primeiro lugar posou para os medios gráficos no campo principal da Cidade Deportiva acompañado do Presidente, Antonio Couceiro.
Xa ante os medios de comunicación, subliñou que nestes primeiros días no Dépor "todo xenial. O equipo portouse moi ben comigo, os adestramentos ben, o míster ben, así que todo de luxo".
Recoñece que foi "duro cando levas tanto tempo, con tanta xente que coñeces" saír do Real Madrid, pero insiste en que o Dépor "fíxomo moi fácil aquí. Apoioume en todo e estou moi contento".
Conta que a súa fichaxe se fraguou cando "de súpeto me chama o meu representante e dime 'oes, hai un interese do Deportivo' e eu nin mo pensei dúas veces. É un gran club e vin sen pensalo". "O Dépor merece estar máis arriba e para iso imos traballar", apunta.
Con dous laterais zurdos máis no cadro, caso de Héctor e Raúl Carnero, Retuerta opina que "sempre é bo ter competencia porque iso nos fai ser mellores xogadores a cada un. Espero que vaia todo ben cos tres e pase o que pase son grandísimos xogadores".
De feito, destaca que Raúl ten "unha traxectoria incrible" pero avisa que "viñemos a competir".
O novo defensor deportivista móstrase con "moitas ganas" de coñecer mañá sábado a #ANOSAFORZA con motivo do Trofeo Teresa Herrera: "O ano pasado puiden ver o que é esta afección", apunta.
Nesta liña, recalca ter "unha chea de ganas de poder ter os primeiros minutos en ABANCA-RIAZOR diante de #ANOSAFORZA. Estou moi contento co recibimento que tiven aquí".
A nivel persoal, indica que a temporada pasada no Real Madrid Castilla "facendo de lateral tamén chegaba arriba. Podo defender e atacar. Veño facer o que viña facendo este tempo".
Aínda que se considera lateral após empezar a súa carreira como central, recoñece que nesta pretemporada "nalgún adestramento probei de central. Aínda non falamos nada diso, pero estou a entrar máis de lateral. Xa sabe (o míster) que podo facelo igual en calquera posición".
Borja Jiménez veo de lateral
Sobre este tema, Borja Jiménez lembrou en rolda de prensa onte que non se expón "empregalo como central, porque el é lateral esquerdo. É onde xogou máis veces, onde sente máis cómodo a priori. E ese é o seu punto de partida. Outra cousa é que por algún determinado motivo ou circunstancia houbese que usalo, pero non está na miña cabeza".
Precisamente o técnico deportivista definiuno como "un lateral con moi bo trato de balón. É un rapaz moi novo, que vén durante anos de participar nunha canteira, co que iso leva a nivel de competir, de ter xente ao seu lado de moito talento. É un rapaz con moita predisposición ao traballo, que cando se incorpora ao ataque faino ben. Temos que ir axustando determinadas situacións do xogo onde queremos que faga cousas diferentes que facía até agora, pero estamos niso".
