O Dépor ABANCA comeza o último mes de competición mañá domingo 4 de maio ás 17:30 (Gol Play, TVG-2, Dazn e 3Cat) ao FC Barcelona no Estadi Johan Cruyff en partido correspondente á 28ª xornada na Liga F.
Os resultados da última xornada, coa derrota en ABANCA-RIAZOR ante o Granada CF, deixou a As Nosas na 13ª posición con 26 puntos.
Fran Alonso, en rolda de prensa, confirmou que esta semana "non tivemos ningunha lesionada" ademais das baixas xa confirmadas de Cris Martínez e Henar Muiña; e de Lucía Martínez, sancionada por acumulación de amoestacións.
Asegura que as futbolistas branquiazuis están "con moitas ganas de enfrontarnos a un dos mellores equipos do mundo".
O técnico deportivista, a falta de 3 xornadas, reiterou ante os medios de comunicación o seu convencemento de que o Dépor ABANCA logrará o seu obxectivo: "Tíveno desde o primeiro día; e todo o grupo, todas as xogadoras, todo o staff temos o convencemento de que vai pasar. Non conseguimos nada aínda pero imos no bo camiño e ímolo a lograr".
Pola súa banda, o FC Barcelona, que xogou o xoves 1 de maio ante o FC Levante Badalona o partido da pasada fin de semana, é o líder con 75 puntos. Se as azulgrana vencen ao Dépor ABANCA e o Real Madrid non gaña en Los Cármenes o domingo ás 16:00 serán campioas matematicamente.
No partido da primeira volta disputado en ABANCA-RIAZOR gañou o Barça por 0-3, con todos os goles na segunda metade.
No Estadi Johan Cruyff esta liga o FC Barcelona gañou á Real Sociedad (3-1), Granada CF (10-1), RCD Espanyol (7-1), SD Eibar (4-0), UD Costa Adeje Tenerife Egatesa (5-1), Real Betis Féminas (4-1), FC Levante Badalona (6-0), Madrid CFF (5-1), Valencia Féminas (4-1), Atlético de Madrid (6-0) e Sevilla FC (5-1); e perdeu co Levante UD (1-2) e Real Madrid CF (1-3).
As Nosas adestráronse esta mañá en Abegondo antes de viaxar a Barcelona, con esta folla de ruta:
Sábado 3 de maio
17:30: Saída desde a Cidade Deportiva
19:20: Saída do voo de Santiago con destino ao Aeroporto de Barcelona - Josep Tarradellas
21:00 (hora aproximada): Chegada ao Aeroporto de Barcelona - Josep Tarradellas e aloxamento no Hotel Eurostars Executive
Domingo 4 de maio
17:30: FC Barcelona - Deportivo ABANCA, no Estadi Johan Cruyff
21:40: Saída do voo do Aeroporto de Barcelona - Josep Tarradellas con destino Santiago
23:30 (horario aproximado): Chegada a Galicia
Finalizado o encontro, o Dépor ABANCA adestrarase de novo o mércores 7 de maio ás 11:00 en Abegondo.