O Fabril empatou (0-0) en Abegondo co Marino de Luanco en partido correspondente á 24ª xornada no grupo 1º de Segunda Federación.
Este resultado deixa ao filial con 34 puntos na 6ª posición da táboa.
Manuel Pablo fai unha valoración positiva porque "fomos desde o principio a tentar sacar os 3 puntos. Estivemos preto da súa área tentando situacións. Tivemos un volume bo de ocasións. Eles tamén teñen calidade e ás veces fanche dano".
Foron baixa por lesión Aarón, Luisao, Álex Pereira e Noé.
O adestrador fabrilista aliñou de inicio a 3 xuvenís (Guerrero, Pablo García e Manu Ferreiro) para medirse a un dos conxuntos máis veteranos da categoría, con ilustres como Lora, Morcillo ou o ex fabrilista Nacho Matador no seu cadro.
Advertía o canario na sala de prensa aos seus xogadores do perigo de contaxiarse do ritmo dos asturianos.
E con ese ritmo pousado arrincou o encontro. Incluso o Marino frecuentou algo máis a área de Alberto. Aos 6 minutos, Álex Arias non conectou un remate na área após xogada por banda esquerda.
Respondeu o Fabril aos 9 minutos cunha internada de Guerrero por banda dereita que mete un balón ao corazón da área e Kevin Sánchez remata en semifallo ao corpo da meta Dennis.
Dous minutos máis tarde, Dennis responde cunha boa parada ao disparo de Fabi, que entrou na área por banda esquerda.
Co transcorrer do partido o Marino foi replegando liñas para taponar as vías de entrada ao Fabril.
Kevin Sánchez gañoulle a acción ao defensor visitante Álex e o seu chute, raso, desvíao Dennis de novo.
Os branquiazuis comezaron a sumar accións de perigo.
Á media hora de xogo, Manuel Pablo viuse obrigado a sustituir a Pablo García, lesionado, por Mardones. "Dobrouse o nocello. Estamos a ter mala sorte. É o 7º ou 8º cambio que fago antes de que acabe a primeira parte. Limítache ao final as xanelas. Están a complicarnos un pouco pero son cousas que pasan", aclarou o preparador fabrilista.
Do Marino de Luanco foi a última gran ocasión da primeira parte.
No minuto 39, Óscar remata libre de marca un centro atrás de Adolfo por banda esquerda. Taponou providencial Íker Vidal, situado diante do porteiro Alberto.
Con empate sen goles acabou a primeira metade.
Após o paso polos vestiarios, o Marino de Luanco puido adiantarse no marcador pero a cabezada de Isma Cerro marchouse rozando o pau esquerdo da portería de Alberto.
Aos 56 minutos, Dennis realizou unha gran parada a remate de Guerrero na ocasión máis clara do Fabril no que ía de partido.
Pouco despois, aos 63 minutos, Kevin tivo nas súas botas o gol pero o seu chute diante de Dennis foise lixeiramente desviado.
No outro área, Óscar plántase ante Alberto e remata ao poste esquerdo cando xa se cantaba o gol nas filas asturianas.
Respondeu o Fabril con outra opción para Kevin Sánchez, escorado en banda esquerda. Salvou Dennis na mesma raia de gol.
O partido abriuse e por instantes foi un correcalles con opcións para uns e outros.
De novo Kevin cabeceou o saque dunha falta ás mans de Dennis, ben situado.
Manuel Pablo refresca ao seu equipo na recta final coa entrada de Carreira, Mane e Kike Fernández por Alfaro, Guerrero e Garrido.
Precisamente Mane a punto estivo de marcar aos 83 minutos. Márchase do seu par e o seu disparo, pegado ao pau esquerdo, atállao Dennis, sen dúbida o mellor futbolista do seu equipo.
O colexiado do encontro, o castelán-leonés Sánguez Ingidua, anulou un tanto a Kevin Sánchez por fóra de xogo. O internacional recibe en longo de Manu Ferreiro e cruza o balón ao pau esquerdo da meta do Marino de Luanco, inalcanzable para Dennis aínda que invalidado pola súa posición irregular por escasos centímetros.
Nun ida e volta os 3 puntos puidéronse ir para Asturias no desconto, pero Alberto detivo un dobre remate de Óscar e Álex Arias.
O capitán fabrilista estivo acertado e ambos os equipos certificaron o empate.
"Sabiamos que o Marino se xuntaba, que non sufría e que tentaba que non tivésemos ocasións. Tivémolas pero non as aproveitamos. Eles tiveron algunha clara loxicamente", resumiu Manuel Pablo.
O vindeiro domingo 2 de marzo ás 12:00, a Fabril visita ao UM Escobedo.
Fabril: Alberto, Marotías, Guerrero (Kike Fernández, min. 78), Alfaro (Mane, min. 78), Kevin Sánchez, Damián Canedo, Garrido (Carreira, min. 78), Íker Vidal, Fabi (Bil, min. 65), Manu Ferreiro e Pablo García (Mardones, min. 29)
Mariño de Luanco: Dennis DF, Borja, Álex, Orfila, Nacho Matador (Maxim, min. 69), Óscar Fernández (Guaya, min. 85), Óscar, Pinín, Adolfo (Álex Alemán, min. 85), Isma Cerro (Estébanez, min. 78) e Álex Arias
Árbitro: Alberto Sánchez Ingidua, do comité castelán-leonés. Amoestou a Álex Arias (min. 7) e Isma Cerro (min. 71)
Incidencias: partido correspondente á 24ª xornada no grupo 1º de Segunda Federación disputado en Abegondo
