O Coyote e Correcaminos infórmannos que o avión saíu de Alvedro pasadas as 20:00 horas. Ao fondo da nave estaban Naybet, Songoo, Mauro, Djalma, Donato e Kouba. Diante quedaron Jaime, Ivan Perez, Victor, Makaay, Pauleta, Turu Flores...
A cea foi servida a bordo. Despois, algúns xogadores botaron unha cabezadita, outros leron e o resto xogaron ás cartas.
Ás 23:10 o Deportivo aterrou no aeroporto de Oslo. A azafata despediuse cun "Viva Coruña" e o piloto desexoulle boa sorte ao equipo no partido do martes. O aeroporto ten un ano, é moi novo e dispón de autovia e tren rápido ata Oslo. A temperatura durante estes dias foron moi boa, con 17 graos pola tarde.
Ás 23:40, unha vez recollidas as maletas, houbo que solucionar os problemas de Jokanovic polo tema do visado... estiveron reunidos durante uns minutos ata aclarar a situación.
Ás 23:55 subimos aos autobuses. Hai 50 km desde o aeroporto ata o Gran Hotel de Oslo.
Chegada ao Hotel. Subimos ás habitacións. Javier Irureta pide que o almorzo sexa servido aos xogadores nas súas habitacións ás 10:30 horas.
Ao longo da xornada de hoxe e mañá seguiremos contando os pormenores da viaxe da expedicion deportivista a Oslo.
