O primeiro equipo adestrouse esta mañá en Abegondo nunha sesión de menor intensidade que as realizadas até agora esta semana.
A mañá arrancou no ximnasio da Cidade Deportiva. Acto seguido, os futbolistas, incluídos os fabrilistas One e Quique Fornos, pasáronse polo campo de quecemento para realizar uns rondos, nos que tamén participou, como un xogador máis, o propio Clarence Seedorf.
Adestrouse con normalidade Guilherme, recuperado dun proceso gripal; e Sidnei estivo co readaptador, Fran Molano.
Após a comida no Hotel Meliá María Pita (14:00 horas), o Dépor volve ao traballo ás 17:30 horas na Cidade Deportiva.
O Dépor puxo fin esta tarde a unha minipretemporada de 6 adestramentos en 3 días
O Deportivo pechou esta tarde unha minipretemporada que se iniciou coa chegada de Clarence Seedorf ao banco deportivista o pasado martes. O desta tarde foi o sexto adestramento nestes tres últimos días, complementados con parada para comer todo o cadro no Hotel Meliá María Pita.
O desta tarde foi un adestramento de fútbol, entre os campos 2 e 3 da Cidade Deportiva. Con Francis como único fabrilista, Seedorf dispuxo un exercicio de posesión e, a continuación, partidos en espazo reducido, de alta intensidade.
Soamente Sidnei adestrouse á marxe, cos fisioterapeutas.
Mañá venres 9 de febreiro, o cadro deportivista está citado ás 12:00 horas na Cidade Deportiva, para a única sesión do día. Antes, ás 11.15 horas, Fede Cartabia atenderá aos medios de comunicación na sala de prensa.
