Zona Fit pechará as súas instalacións en Riazor, nas que se proxecta situar o museo do Deportivo

A decisión de pór punto final a esta actividade o 31 de decembro tomouse tras avaliar a situación económica de Zona Fit, cunhas perdas que, entre xaneiro de 2014 e novembro de 2015, superan os 130.000 euros. Hai que ter en conta ademais que desde que o RC Deportivo quedou coa explotación directa do ximnasio, non se facturaban arrendamentos polo uso os baixos destinados a Zona Fit, como sinala a Auditoría de Contas recentemente publicada, o que suporía unhas perdas maiores. 

 

Ademais, como xa se reflicte nas contas anuais a disposición dos accionistas, esta situación obrigou ao RC Deportivo a facilitar un préstamo participativo á sociedade que explota Zona Fit para evitar a súa disolución polo seu desequilibrio patrimonial. 

 

Nas instalacións que ocupa actualmente o ximnasio, o Real Club Deportivo proxecta situar o seu propio Museo histórico, que se definirá e creará con motivo do 110 aniversario da fundación do Club. Previamente adecuaranse as instalacións necesarias ao longo do ano 2016. O Museo permitirá expor e pór ao alcance de todo o deportivismo o material histórico que posúe o Deportivo e contidos dixitais, que se complementarán con doazóns e cesións dos seguidores branquiazuis. 

 

O Real Club Deportivo traballa xa intensamente en analizar outros museos similares e organizar e captar o material necesario para desenvolver unha primeira exposición en 2016 que poña ao alcance de todos os seus seguidores o principal material histórico do Club con motivo do 110 aniversario e que será a base do futuro museo.