Jose Ángel entra na recta final da súa recuperación.
O mediocentro deportivista, após unhas semanas con traballo personalizado co readaptador Nando Rodríguez, comezou estes días a facer algunha tarefa co grupo, por exemplo este venres o quecemento.
Aos poucos Jose Ángel irá aumentando a súa presenza nas sesións de adestramento até a súa completa incorporación.
Pola súa banda, Arnau Comas fai parte co grupo e parte co readaptador. Na súa presentación, o futbolista catalán explicou que "vou moi ben. De momento dentro dos prazos. Opereime a finais da liga pasada e levo un par de meses. Estou a empezar a facer algunha cosita co grupo sen contacto aínda. Se cadra para principio de liga a ver se podo estar dispoñible e fisicamente a máximo rendemento".
Antonio Hidalgo dispuxo este venres nubrado, entre os campos 2 e 3, unha activación, un exercicio de posesión e un partido.
Este sábado 19 de xullo, o Dépor conclúe a segunda semana de pretemporada ás 10:30 en Abegondo cun novo partido de adestramento.
