Olaya Enrique Rodríguez (Avilés, Asturias, 10 de maio de 2005) foi presentada este mediodía na sala de prensa de Abegondo como xogadora do Deportivo ABANCA até xuño de 2028.
Kevin Cabado, responsable do Dépor ABANCA, afirmou que "é un día moi feliz para nós porque Olaya incorpórase en propiedade. Vai estar aquí como mínimo 3 temporadas. E xa digo que vai xogar moitas máis".
Cre que Olaya Rodríguez "namorou a ABANCA-RIAZOR, tivo todo o dunha xogadora Dépor. A nivel futbolístico é unha das maiores xoias a nivel nacional e que cumpriu todas as etapas de selección española".
Recalca que "adestra ao 100% todos os días. É pura paixón pero despois é pura bondade, acollendo ás mozas que están a chegar. Ten 20 anos cumpridos hai pouco pero parece que ten 30".
Pola súa banda, a atacante deportivista afirmou que "tiñamos a mesma idea o Dépor ABANCA comigo e eu co Dépor ABANCA. Estou súper feliz, é o que quería. Estou onde quero e moi conectada coa cidade, co equipo e con ganas de dar todo polo Dépor ABANCA".
Conta que a temporada pasada, "para ser a miña primeira temporada en Liga F sentinme moi importante, moi protagonista. Espero estar 3 temporadas sentirme igual. Para iso teño que traballar todos os días no adestro, nos partidos. E estou disposta a facelo".
Apunta así mesmo que o Dépor "está a apostar todo polo feminino tanto na Cidade Deportiva como o apoio que nos dan. É algo que sente. O Dépor sente o que che dá, sente a cidade, a afección... Ata que non o vives non o podes explicar".
Olaya márcase como reto persoal "estar para todo o que veña, asumir o rol que me toque, sexa desde fóra, sexa desde dentro, sexa nunha posición que non é a miña. Teño que dar o 100% onde me toque para poder axudar ao equipo".
Kevin Cabado
Concluída a rolda de prensa de Olaya Rodríguez, Kevin Cabado respondeu a algunhas preguntas dos medios de comunicación. Estas foron algunhas das súas respostas.
Fichaxes
"A primeira tarefa era reter o talento. Retivémolo e con contratos que falan da aposta do Club".
"Tentamos reforzar en lugares que estabamos curto de efectivos ou de calidade".
"Na primeira semana de adestramento vese que o equipo transmite moi boas sensacións. Despois isto é fútbol e poranos no noso lugar".
"Estamos ilusionados, con ganas de crecer, de dar un pasiño máis, de ilusionar a #ANOSAFORZA e de que cada vez ABANCA-RIAZOR responda mellor".
Mercado pechado
"Está aberto até mediados de xaneiro. Estamos contentos co cadro que temos. Se a liga empeza mañá estariamos preparados. Temos todas as posicións dobradas, mozas do filial que están a demostrar igual de preparadas que as do primeiro equipo. Pero non pechamos a porta. Temos licenzas libres".