O campo da Devesa de Bembibre volveu ser escenario dun partido de pretemporada do Deportivo, concretamente o último de preparación do Dépor 2020-2021 a unha semana e un día de arrincar a competición regular en casa contra o Salamanca. Outro conxunto castelán, neste caso o filial do Real Valladolid, que militará no outro subgrupo do grupo I, era o rival ante o que poder realizar os últimos axustes con marxe de erro.
O Dépor non estivo cómodo na primeira parte e só puido inquietar cun par de disparos de Lara. Un deles, superado o ecuador, obrigou a intervir Samuel, que tamén viu como Gontán estrelou a outra ocasión branquiazul no lateral da rede. Keko, Claudio ou Miku estiveron activos arriba pero en ningún momento cómodos para xerar ocasións claras de perigo. Tamén lle custou ao Valladolid na primeira media hora de partido pero desde ese momento foise soltando para provocar as mellores oportunidades antes do descanso. Moha, primeiro de falta e despois de xogada individual, disparou alto en ambos os casos. Zalazar da raia no 39 e sobre todo Pablo Vítor, obrigando a sacar a relucir os seus reflexos a Lucho, tivo nas súas botas abrir o marcador xusto antes do descanso.
Á volta de vestiarios o Dépor estivo máis fresco en ataque e conseguiu xerar máis ocasións de perigo. A primeira por mediación de Beauvue, que estrelou o balón no lateral ao atopar a perna de Miguel Rubio na súa traxectoria. Keko de falta directa tamén tivo a súa oportunidade, menos clara que a que en xogada individual dispuxo minutos despois. Entre medias, Eliot alto de falta e Víctor Socorro, obrigando a facer un paradón a Lucho, tamén dispuxeron das súas opcións para marcar. Con 0-0 no marcador chegaron os movementos de banco, seis simultáneos nos valisoletanos, máis secuenciados no Dépor.
Mentres o Dépor seguíao tentando sen demasiada claridade, un dos recentemente ingresados no campo, Uche, do Real Valladolid, aproveitou a presión sobre Lucho García para interceptar un pase do porteiro deportivista e marcar case sen oposición o único tanto do partido. Superado o minuto 90 unha falta colgada á área e rematada por Alonso puxo o 0-2 no marcador, o da primeira derrota do Dépor no último partido de preparación previo ao arranque da competición.
RC Deportivo: Lucho, Bóveda (Valín, min. 75), Mujaid, Derik (Borja Granero, min. 46), Juan Rodríguez (Héctor, min. 46), Álex (Uche, min. 65), Borges (Gandoy, min. 75), Keko, Lara, Miku (Adri Castro, min. 63) e Beauvue.
R Valladolid Promesas: Samuel (Gaizka, min. 70), Sergio López, Vilarrasa (Neto, min. 70), Miguel Rubio, Alonso, Uriol (Maroto, min. 86), Moha (Miguel Carro, min. 46), Pablo Vítor (Dalison, min. 70), Zalazar (Castre, min. 70), Eliot (Uche, min. 70) e Benito (Víctor Socorro, min. 70).
Goles: 0-1 Uche (min. 85); 0-2 Alonso (min. 90+2).
Árbitro: Valdés Varela (c. Castelán leonés). Amoestou a Juan Rodríguez (min. 38), Claudio (min. 45+1) e Pablo Vítor (min. 55).
Incidencias: 5º e último partido de pretemporada do Dépor 2020-2021 disputado no campo da Devesa de Bembibre ante uns 300 espectadores.
