A peña deportivista Don Bosco Pepe Guillín distingue esta tarde ao dianteiro deportivista Florin Andone pola súa traxectoria profesional.
O acto será hoxe mércores 13 de decembro ás 20:00 horas no Colexio Salesianos, entrada pola rúa Don Bosco nº 15.
Pepe Guillín, ex Conselleiro do Club, leva toda a súa vida vinculada ao deporte coruñés, co Español, o Fabril, o Deportivo e o Hockey Club Liceo, entre outros.
Cada ano, a agrupación deportivista que leva o seu nome e que el mesmo preside, premia a traxectoria profesional dun xogador do Real Club Deportivo. Este ano, o galardón recaeu no dianteiro romanés, máximo goleador do Dépor a temporada pasada.
Triplo premio branquiazul na Gala do Fútbol Base provincial, mañá xoves en Arteixo
O RC Deportivo recibirá premios por triplicado na VI edición da Gala do Fútbol Base da provincia da Coruña, que se celebrará mañá xoves 14 de decembro.
O Centro Cívico Cultural de Arteixo será o escenario, a partir das 20:30 horas, da entrega duns galardóns cos que se premia o esforzo de todos aqueles que traballan por e para o fútbol coruñés.
Entre as diferentes categorías que se entregan, o RC Deportivo recollerá tres premios. En primeiro lugar, haberá un premio para o Club pola súa xestión deportiva. Outro o recollerá Pedro Mosquera, con motivo da súa acción solidaria coa Fundación Sumba. O terceiro será para Manuel Pablo, en recoñecemento á súa traxectoria deportiva.
Enrique Calvete e Pedro Mosquera representarán ao Club neste acto.
Pedro Mosquera recibirá o premio Pirata de Honra este venres 15 en Muxía
A peña deportivista Os Piratas de Muxía concedeu un dos seus 'Piratas de Honra' a Pedro Mosquera.
O Salón do Voluntariado de Muxía acollerá este venres 15 de decembro, a partir das 20:30 horas, o acto de entrega destes galardóns, que cumpren a súa XXIII edición.
O capitán deportivista foi distinguido nesta edición xunto ao veterano deportista Stevo Zas e aos clubs SD Laxe, Muxía CF, FSF Villa de Cee, Fisober FSF e Cabana SD.
