Carolina Arbeláez é a única baixa no Deportivo ABANCA de cara á visita ao EDF Logroño deste domingo 21 de marzo ás 12:00 no campo de Las Gaunas, correspondente á 23ª xornada na Primera Iberdrola.
A futbolista colombiana foi sometida esta semana a unha intervención ambulatoria no Hospital Quirón Salud A Coruña para aliviar os problemas lumbares que sofre. "Segue en tratamento cos médicos e xa comeza a ver o sol. Ese sol que se está mostrando na Coruña tamén o ve ela. Moi contentos de que vaia mellorando", manifestou respecto diso en rolda de prensa Manu Sánchez, técnico do Deportivo ABANCA.
Entra na convocatoria a canteirá Eva Dios, como vén sendo habitual nos últimos partidos.
Precisamente o adestrador deportivista destacou na súa comparecencia de hoxe ante os medios de comunicación o partido de Eva ante o Rayo Vallecano: "Para min foi unha das xogadoras destacadas. Estamos a falar dunha nena que aínda se está afacendo aos ritmos e aos tempos de Primeira División. Nunha posición moi atípica para ela deunos moitísimo traballo en defensa e desequilibrio desde fóra. Estamos moi contentos por ela. Hai que darlle tempo para que vaia dixerindo todo iso, a realidade que ten agora. Ten a cabeza bastante ben amoblada. Ela sabe que isto é Primeira División. Se estás á altura estás e se non estás á altura tes que traballar para estalo. Ese é a mensaxe que lle mandamos e acéptao ben".
Aproveitando a festividade de hoxe, Manu Sánchez trasladou ás 10:30 o adestramento inicialmente previsto para as 17:30 horas.
O Deportivo ABANCA emprenderá viaxe por estrada mañá sábado 20 de marzo. Antes, haberá una unha última sesión de traballo en Abegondo, a partir das 9:30 horas.
O plan de viaxe do Deportivo ABANCA é o seguinte:
Sábado 20 de marzo
9:30: Adestramento en Abegondo
12:00: Saída en autocar a Logroño
20:00 (horario aproximado): Chegada ao Hotel Zenit Logroño
Domingo 21 de marzo
12:00: EDF Logroño - Deportivo ABANCA, en Las Gaunas
Ao concluír, saída en autocar á Coruña