O Deportivo completará catro sesións de traballo matinais antes de recibir á SD Logroñés este sábado 11 de novembro ás 19:00 en ABANCA-RIAZOR (TVG-2 e FEF TV), en partido correspondente á 11ª xornada no grupo 1º de Primera Federación.
Os resultados da fin de semana deixaron a Os Nosos na 12ª posición da táboa con 14 puntos.
Cada día os futbolistas están citados ás 8:45 xa na instalación para almorzar; e logo tamén comerán após o adestramento entre os campos 2 e 3 da Cidade Deportiva.
Onte en rolda de prensa, Imanol Idiakez subliñou que "dentro me vou a encargar de dicir as cousas que necesitamos e logo tratar de sacar rendemento ao cadro porque o de hoxe (polo partido de onte ante a Real Unión de Irún) non é propio de nós".
Confesa o técnico deportivista que "estamos todos cun desgusto importante, cunha mala uva importante porque unha cousa é perder e outra a imaxe que demos. Temos moito que analizar e moito traballo por diante para cambiar isto".
Ian Mackay, capitán do equipo, recoñeceu que a imaxe "non está de acorde con toda a xente que nos acompaña. Estamos desgustados por nós pero sobre todo por eles, porque sempre nos acompañan en todos os sitios. Temos que traballar e tentar volver á senda do triunfo".
E Lucas Pérez lembrou ante os medios de comunicación desprazados a Irún que "somos o Deportivo e iso esíxenos dar o máximo e o mellor en cada partido"; apuntou que "o que temos que facer é competir e gañar"; á vez que recalcou que "non hai que facer outra cousa que seguir traballando".
A planificación semanal, sempre susceptible de sufrir variación por razóns técnicas, é a seguinte:
Martes 7 de novembro
11:00 h.
Mércores 8 de novembro
10:30 h.
Xoves 9 de novembro
10:30 h.
Venres 10 de novembro
10:30 h.
Sábado 11 de novembro
19:00: Deportivo - SD Logroñés, en ABANCA-RIAZOR
