Dani Barcia subliñou en Vicarage Road, ao concluír o amigable ante o Watford, terceiro desta pretemporada do Dépor, que "foi un partido complicado contra un gran rival. Son moi físicos aínda que con balón cústelles algo máis".
Cre que o Dépor empezou o partido "moi forte. Tivemos a mala sorte do gol nun par de fallos pero estou contento, co equipo contento. Temos que seguir así nesta dinámica e o sábado (en Middlesbrough) a por outro máis".
O central coruñés afirma que após a súa lesión da temporada pasada "estou a atoparme moi ben. Ao principio nos primeiros 45 minutos notábame canso e hoxe (por onte) noteime bastante ben. E o equipo vai ir a máis. Contra un bo rival (o Watford) o ritmo non o notamos en nada e imos ir a máis seguro nestas semanas que quedan de pretemporada".
Finalmente, este sábado 2 de agosto ante o Middlesbrough no Riverside Stadium (16:00 hora galega, 15:00 hora local, YouTube RC Deportivo) Dani Barcia espera "un partido exactamente igual. Vai ser de ritmo alto, de ida e volta. Temos que ir aos duelos, aos choques como fixemos ante o Watford e tentar levarnos o partido".