O DéporCampus Cabreiroá, a principal actividade social que chega da man da Fundación RC Deportivo, concluíu a súa edición de 2025 cun rotundo éxito organizativo.
Na sexta e última semana a actividade centrouse na sexta quenda de Abegondo; e nas sedes de Zas e Cedeira, cun total de 250 nenos e nenas.
A novidade deste ano consistiu en que futbolistas do primeiro equipo deportivista tanto masculino como feminino xunto a canteiráns e canteirás foron os encargados cada semana de repartir os diplomas, asinar autógrafos e fotografarse cos alumnos e alumnas.
Nesta última cita os canteiráns Brais Suárez, Dani Estévez e Nájera estiveron no campo 7 de Abegondo; e Álvaro Fraga clausurou o de Cedeira.
O DéporCampus Cabreiroá 2025 desenvolveuse, para participantes desde os 6 aos 14 anos (é dicir os nados de 2011 a 2019 incluídos), entre finais do mes de xuño e estes primeiros días de agosto.
Abegondo, Bertamiráns, Boiro, Caranza, Cee, Cuntis, Monforte, Ourense, Santa Comba, Sarria, Silleda, Terras de Maside, Vila de Marín e Zas; ás que este ano se sumaron Lugo, Cedeira, Vilalba, Sada e o colexio Santa María del Mar foron as localizacións da actividade.
Os DéporCampus Cabreiroá empregan o método Dépor, impartido por adestradores do Club; e baseado no respecto polo rival, o xogo limpo e o esforzo.
Entre os obxectivos están aprender e desenvolver a coordinación a través de xogos coordinativos; aprender as habilidades e conceptos na relación co corpo; aprender as habilidades e conceptos na relación co balón; traballar os fundamentos técnico-tácticos cunha metodoloxía analítica; competir e gozar mediante partidos en diferentes espazos; e finalmente transmitir os valores que representa o Dépor: RESPECTO, SOLIDARIEDADE, AMIZADE, XOGO LIMPO, INTEGRACIÓN, ESFORZO E FELICIDADE.
A Fundación RC Deportivo xa se puxo ao choio para a edición de 2026 conscientes da importancia a nivel social que ten o DéporCampus Cabreiroá.
Toda a información atópase en deporcampus.rcdeportivo.es.