Cristina Martínez Gutiérrez (Astorga, León, 26 de xuño de 1993) converteuse esta tarde, no partido ante a CE Europa no Estadio ABANCA-RIAZOR, na primeira xogadora da historia do Dépor ABANCA en alcanzar os 200 partidos oficiais coa camiseta branquiazul.
Na previa do partido, a defensa e capitá deportivista recibiu de mans do presidente branquiazul, Álvaro García Diéguez, e do conselleiro Carlos Ballesta unha camiseta enmarcada do Dépor ABANCA co seu nome e o número 200 ás costas.
Cris Martínez é a única sobrevivente da primeira temporada do Deportivo ABANCA, a 2016-17, na que o Club recuperou o seu equipo feminino case 30 anos despois da desaparición do Karbo Deportivo, que entre 1984 e 1988 defendeu a camiseta branquiazul como un equipo máis do RC Deportivo.
A lateral astorgana disputa a súa oitava temporada nas filas deportivistas, nas que xogou 200 partidos, divididos en 185 en Liga (50 na máxima categoría, 76 en Reto Iberdrola/Primera Federación Iberdrola e 59 en Segunda Nacional), 6 en Copa de la Reina, 8 en playoff de ascenso a Liga F e 1 en playout de Primera RFEF. A conta goleadora de Cris Martínez elévase a 4 tantos: 1 en playoff de ascenso a Liga F, 2 en Segunda Nacional e 1 en Primera Federación Iberdrola.
Cris Martínez foi titular no primeiro partido oficial da historia do Dépor ABANCA, o 4 de setembro de 2016 ante o Oviedo Moderno CF en Ponte dos Brozos (Arteixo). Tamén foi titular no partido do ascenso á máxima categoría, o 19 de maio de 2019 en campo do CD Femarguín, e no debut na división de honra, o 8 de setembro de 2019 fronte ao RCD Espanyol en Abegondo.
O top-10 de xogadoras con máis partidos oficiais complétano Gaby (117), Iris (107), Peke (106), Lía (102), Eva Dios (97), Teresa Abelleira (92), Raquel García (92), Inés Altamira (90) e Ainhoa Marín (89), estas tres últimas coa súa actuación desta tarde xa sumada.
