Cristian Ignacio Herrera Pérez (Las Palmas de Gran Canaria, 13 de marzo de 1991), coñecido futbolísticamente como Cristian Herrera, foi presentado esta mañá como novo xogador do Dépor para esta temporada 2024-25 con opción de ampliación unha campaña máis.
Fernando Soriano, Director de Fútbol, manifestou que "vén complementar a zona de ataque. É polivalente, pode xogar en calquera das 3 posicións de arriba: punta, as dúas bandas ou mesmo por detrás da punta. Vén darnos esa experiencia, complementar aos xogadores que xa temos e polas súas características imos ver se segue tendo ese gran olfacto de gol".
Pola súa banda, Cristian Herrera desvela que a súa fichaxe se produciu cunha chamada de Fernando: "Díxome o proxecto que había e sinceramente non mo pensei porque o Deportivo é un club histórico e creo que está a facer as cousas ben para plantarse outra vez onde ten que estar o equipo".
Confésase "adicto a estar ben fisicamente. O verán para min foi longo porque era xente libre, pero prepareime todos os días. Sabía que ao equipo que fóra tiña que estar preparado e nas mellores condicións. Cóidome bastante. Fago ximnasio practicamente todos os días e coa comida levo unha certa dieta que me permite render e estar a tope sempre".
O novo dianteiro deportivista exponse nas súas expectativas "axudar ao equipo todo o máximo que poida e se o ano que vén pódese dar esa renovación, por min encantado de estar outro ano máis".
Defínese como "un xogador polivalente, vertical e adáptome a calquera posición do ataque. A miña principal virtude é que sempre quero chegar á área, facer goles, axudar ao equipo ou asistir".
Cristian Herrera considérase "preparado. Sei que veño ao Deportivo, que é un club esixente, pero tamén son a persoa máis esixente do mundo comigo mesmo; e creo que estou preparado para asumir este reto e para axudar ao equipo en todo o posible".
Do choque deste venres 13 de setembro en Córdoba (20:30, LaLiga Hypermotion e #Vamos) advirte que "todos os partidos en Segunda División son difíciles. Non podemos ir relaxados a ningún campo. É certo que o Córdoba CF é un recentemente ascendido, pero teñen a mesma ilusión que nós. Tamén é un equipo histórico de Andalucía, que estivo en Primera. Eles teñen o seu obxectivo e nós temos os nosos e non podemos ir especular nin moitísimo menos. Temos que ir sendo nós mesmos e con fame para traernos os 3 puntos".
