O RC Deportivo e todo o deportivismo renderán homenaxe a un dos seus grandes mitos vivintes, Djalma Feitosa Dias 'Djalminha', o vindeiro domingo nos prolegómenos do encontro ante o RC Celta Fortuna (19:00 h.), polo que o Club pide aos seus seguidores e seguidoras que accedan ao Estadio ABANCA-RIAZOR con media hora de antelación para non perdelo.
Djalminha, xogador deportivista durante 7 temporadas (1997-2004) e gañador de 4 dos 7 títulos oficiais que o Club garda nas súas vitrinas, recibirá a homenaxe por parte do RC Deportivo e por todo o deportivismo. Ademais, realizará o saque de honra do encontro entre branquiazuis e celestes.
O futbolista brasileiro, que marcou 50 goles oficiais coa camiseta branquiazul, cifra que só 18 futbolistas máis alcanzaron ao longo dos case 117 anos de existencia do Club, atópase durante esta semana na Coruña da man de 'Informe+'. O programa de Movistar+ mostra o lado menos visible do espectáculo deportivo a través de lendas do pasado, nomes propios da actualidade e tamén deportistas anónimos, tratando de manter o legado e a mirada de Michael Robinson en 'Informe Robinson'.
