Fernando Soriano, Director Deportivo do Club, pasouse pola sala de prensa de ABANCA-RIAZOR.
Cre que o ascenso "é un premio de todos, do traballo diario tanto noso como voso (en alusión aos medios de comunicación). De nós e de #ANOSAFORZA; e voso porque sempre estades aí axudando".
Resalta que "cando se sofre e conséguese o obxectivo o sufrimento merece a pena e sabe mellor. Pasamos momentos nos que a temporada non foi fácil, foi dura, pero a segunda volta é memorable. De 17 gañar 14 e empatar 3 di moito da capacidade deste equipo que tivo que sobreporse. Na primeira volta cando te ves tan abaixo faiche máis forte. O míster soubo xestionar perfectamente, dirixir, redirixir..."
Subliña que "agora a celebrar. Sobráronnos 2 xornadas para poder gozar e a pensar pouquiño a pouco no que vén".
Confesa que "a humildade do grupo, o traballo diario era a min o que máis me daba confianza. Esa unión nos adestramentos. Hoxe acordámonos dos que xogaron pero xogadores que non xogaron: Alberto; Eric aínda non debutou; Valcarce, Salva que disputaron menos minutos pero que o día a día foi incrible. E logo a xente que rodea ao equipo: material, médico, nutricionista, prensa... E #ANOSAFORZA que foi unha muleta importantísima nos momentos difíciles. Nunca nos deixaron de lado".
Fernando Soriano apunta que viviu o partido de onte "máis tranquilo que o día do CD Arenteiro. Estaba moi marcado este día. Os xogadores, cando acabou o partido de Sestao, xa estaban a pensar neste partido, con todo o que rodeaba o momento. Víalles moi metidos durante a semana. Iso deume tranquilidade. Por suposto durante o partido, os primeiros 10 minutos fixemos boa presión, tivemos algunha ocasión; e a partir de aí o Barça puido desenvolver o seu fútbol, púxonos en perigo. E na segunda parte foi dun alto nivel, o gol de Lucas, as ocasións que xeramos, o pouco que concedemos. Agora a gozalo".
O Director Deportivo branquiazul lembra na temporada momentos como "contra a CE Sabadell FC, na xornada 7 ou 8, empeza a xornada e estamos en postos de descenso. Aí seguías vendo ao equipo crer nunha idea. O día de Irún (3-0) fíxonos moito mal, tocar fondo e iso foi un día importante. A nivel futbolístico, deportivo e de conexión o día da 'Ponfe' foi algo máxico. Para min foi o partido con mellor sensación, que máis unión conseguiu entre todos. A partir de aí foi un non parar. Nestes últimos 17 partidos o equipo demostrou unha gran solidez. O día do Nástic, o do Sabadell aquí non foron grandes partidos pero o resto o equipo estivo francamente ben. Encima participaron xogadores diversos por sancións, por lesións... E iso fíxonos chegar a estas alturas xa ascendidos".
