Fran Alonso compareceu esta mañá na sala de prensa de Abegondo como previa do seu encontro ligueiro fronte ao Real Madrid CF, mañá sábado 14 de decembro ás 16:30 en ABANCA-RIAZOR.
O adestrador deportivista resalta que todos os cambios requiren un proceso de adaptación e as xogadoras están moi unidas. Ademais, "están todas moi enchufadas e temos moitísimas ganas de mellorar a última actuación mañá".
O Dépor ABANCA é consciente da dificultade do encontro, segundo Fran, pero "temos moitas ganas de facer un bo partido, de competir ben". Con respecto ao rival, "teñen dúas por posición e dúas moi boas, aínda que xogaron Champions, as rotacións non lles afectan, pero teñen debilidades e aí imos tentar castigalas", engade.
O técnico tamén resalta a súa alegría de cara a xogar nun estadio como ABANCA-RIAZOR: "Paréceme que a aposta do club polo fútbol feminino é espectacular. Xogar en ABANCA-RIAZOR, que é un dos mellores estadios no país, contra un rival da categoría do Real Madrid, é unha experiencia preciosa que espero que todas as xogadoras gocen, eu así o farei".
Finalmente, ve o encontro como "unha boa oportunidade para competir. En caso de conseguir puntos sería espectacular. E en caso de non conseguilo, ninguén espera que consigamos nada. Isto é un proceso e para min o importante é como vexo o día a día".
