Madrid CFF e Dépor ABANCA víronse as caras este domingo 8 de febreiro no Estadio Fernando Torres de Fuenlabrada, en partido correspondente á 19ª xornada de Liga F.
Golearon as deportivistas por 1-6 nunha gran segunda metade, na que desarbolaron por completo ao conxunto madrileño.
Fran Alonso destacou no pospartido a "actitude espectacular" do conxunto branquiazul ante "un moi bo equipo".
Desta forma, As Nosas, que suman 20 puntos na 11ª posición, logran a súa segunda vitoria consecutiva lonxe de ABANCA-RIAZOR.
Á espera da chegada da dianteira internacional surafricana Hildah Magaia, reforzo invernal do Dépor ABANCA, foron baixa por lesión Henar e Millene Cabral.
Paula Novo, que este sábado 7 xogou medio tempo co filial no Dépor Training Center ante o Real Racing Club, Redru e Lucía Rivas foron as representantes de ANOSACANTEIRA.
O primeiro gol do partido foi para Allegra, que bateu a Inês Pereira no minuto 6 despois dunha cabalgada en solitario. No entanto, a colexiada do encontro anulou o tanto por fóra de xogo da atacante madrileña.
Si valeu o primeiro do Dépor ABANCA, logrado por Espe Pizarro ao cuarto de hora por un penalti cometido a ela mesma. A internacional uruguaia transformou a pena máxima por todo o recanto.
Nautnes igualou pasada a media hora cun tiro cruzado ao que non pode responder Inês Pereira.
Non veu abaixo o Dépor ABANCA, que logrou marcharse ao descanso con vantaxe.
Xa no desconto, Olaya xuta unha falta directa desde moi lonxe. A porteira Paola despexa como pode e Barth acerta a meter o rexeite na portería branca.
Con 1-2 chegouse ao descanso.
Após o paso polos vestiarios, golpeou de novo o Dépor ABANCA.
Ao saír dun córner, Paula Gutiérrez xuta desde a frontal e o rexeite da porteira Paola aprovéitao Raquel para lograr o 3º.
Coas Nosas desmelenadas, Vera rouba unha pelota e o seu disparo en parábola cóase na portería do Madrid CFF, xa desaparecido do partido.
Paula Gutiérrez subía o 5º no minuto 63. Recibe na frontal da área e coloca o balón case no recanto do Madrid CFF, imparable para Paola.
Ainhoa Marín regalou o 6º no minuto 86 a Paula Monteagudo, que relevara a Espe Pizarro pouco antes.
A canteirá, que regresou á competición após superar unha lesión, lograba o seu terceiro tanto en Liga F.
Con 1-6 chegouse a un final de partido plácido para As Nosas.
"Os momentos que sufrimos liquidámolo ben", resumiu Fran Alonso na súa comparecencia pública após cualificar o resultado como "unha goleada histórica".
Madrid CFF: Paola, Mendoza, Villafañe, Mónica (Olofsson, min. 46), Hildur, Alba Ruiz (Nerea Sánchez, min. 46), Allegra (Laborde, min. 61), Marina Rivas (Andonova, min. 61), Mellgard (Aymerich, min. 75), Nautnes e Sosa
Deportivo ABANCA: Inês Pereira, Samara, Raquel, Barth, Vera, Lucía Martínez (Redru, min. 80), Paula Gutiérrez (Marina Artero, min. 70), Olaya ( Eva Dios, min. 74), Ainhoa Marín, Lucía Rivas (Marisa, min. 75) e Espe Pizarro (Paula Monteagudo, min. 80)
Árbitra: Elena Peláez Arnillas, do comité castelán-leonés. Amoestou a Villafañe (min. 19)
Goles: 0-1 Espe Pizarro, de penalti (min. 14); 1-1 Nautnes (min. 35); 1-2 Barth (min. 45+1); 1-3 Raquel (min. 46); 1-4 Vera (min. 58); 1-5 Paula Gutiérrez (min. 63); 1-6 Paula Monteagudo (min. 86)
Incidencias: partido disputado no Estadio Fernando Torres de Fuenlabrada cun céspede brando polas choivas
