Antonio Hidalgo, do mesmo xeito que onte Loureiro na sala de prensa do Dépor Training Center, pon "moito en valor o que estamos a facer. Neste tramo de liga estamos a facer moitísimas cousas ben. Temos marxe de mellora para poder seguir evolucionando como todos os equipos".
Pensa que despois de 5 triunfos consecutivos (incluído o de Copa), "as vitorias danche confianza para poder traballar con moita máis tranquilidade. A categoría diche que calquera equipo pode gañar a calquera. Hai unha igualdade máxima. Iso debémolo de ter en conta".
Subliña que "o obxectivo principal do ano era estar a pelexar entre os 6 primeiros e niso debémonos centrar".
Tamén pide o preparador branquiazul "darlle moito valor aos rivais aos que nos enfrontamos. Hai veces que pensamos que pode ser máis sinxelo do que é e calquera equipo está moi ben traballado, con xogadores de moitísimo talento. Hai que estar atentos sempre, tes que ter esa dose de humildade grande porque a categoría así cho pide. Hai que traballar moitísimo como están a facer os xogadores con e sen balón. Esa é a clave do equilibrio que temos agora mesmo".
O técnico deportivista insiste en que "todos os partidos van ser moi igualados. O Albacete Balompié leva moito tempo traballando con Alberto (o seu técnico), ten uns mecanismos moi traballados".
Explica que o rival do Dépor este sábado 29 de novembro ás 18:30 (LaLiga TV Hypermotion, GOL, TEN e TVG) no Estadio Carlos Belmonte "mete moita xente a última liña, saca moitos centros, os seus laterais son moi profundos, temos que estar moi atentos a esas situacións. Coñecémonos ben os dous adestradores".
Espera pois un "partido igualado da categoría. Temos que pelexar, sufrir, estar moi compactos, ser sólidos, como vimos sendo ultimamente".
En canto á posición da táboa, líder de LaLiga Hypermotion, opina que "é agora mesmo anecdótico. É ir situándose na clasificación por esas posicións que che dean dereito ao play off. E a partir de aí ir traballando cada día, vendo os rivais que nos van tocando cada semana e ir axustando situacións".
