Irene Ferreras (4 de marzo de 1989, Fuenlabrada), responsable técnico do Deportivo ABANCA, acaba de ser nomeada polo Comité de Adestradores da RFEF mellor adestradora da temporada pasada en Primera RFEF, premio Ramón Cobo.
A entrega deste galardón, que recoñece "tanto os seus méritos deportivos como o seu bo facer fóra do campo", será o vindeiro martes 24 de outubro ás 19:00 na sede da Real Federación Española de Fútbol en Las Rozas (Madrid).
Irene Ferreras chegou a Abegondo a temporada pasada, na que por dúas ocasións quedou a un gol de lograr o ascenso das Nosas á Liga F. Esta campaña, o Dépor ABANCA suma 4 vitorias nas súas 4 primeiros partidos de liga e é líder en solitario.
A súa traxectoria profesional levouna ademais polos bancos do Olímpico de Moratalaz, La Solana FF, Rayo Vallecano, Valencia CF e Real Madrid, neste caso como segunda adestradora.
Todo un exemplo dentro e fóra dos terreos de xogo, no barrio de Loranca da súa cidade natal, Fuenlabrada, o campo municipal de fútbol leva o seu nome desde o pasado 2020. "Hai que facer bandeira da cidade e iso só fano referentes deportivos como Irene Ferreras", declarou o día da súa homenaxe o alcalde de Fuenlabrada, Javier Ayala.
